გაერთიანებული ოპოზიცია “ძალა ერთობაშია”-ს წევრი, ჯანდაცვის პოლიტიკისა და მართვის სპეციალისტი, მედიცინის დოქტორი სერგო ჩიხლაძე კიდევ ერთხელ მოითხოვს ჯანდაცვის სამინისტროსგან საჯაროდ დასმულ კითხვებზე კონკრეტული პასუხების, მოსახლეობისათვის მნიშვნელოვანი ინფორმაციის მოწოდებას:
“მეორე წელია ვხედავთ როგორი ხარვეზებით მიმდინარეობს ეს პროგრამა საქართველოში. მიუხედავად ჩვენს მიერ საჯაროდ დასმული კითხვებისა, ვერ მივიღეთ ვერანაირი განმარტება ჯანდაცვის სამინისტროსგან. ამიტომ, კონკრეტული კითხვებით, კიდევ ერთხელ მივმართავთ სამინისტროს და ასევე აუდიტის სამსახურსაც:
-
წარმოადგინოს ჯანდაცვის სამინისტრომ ის გეგმა და პარამეტრები რომლითაც მან იხელმძღვანელა ამ პროგრამის დაგეგმვისას და ბიუჯეტის შედგენისას 2017, 2018 და 2019 წლებში!
-
გაგვცეს ჯანდაცვის სამინისტრომ პასუხი ამ პროგრამის ფინანსურ დანახარჯების საეჭვო დინამიკაზე, კერძოდ კი, როგორ მოხდა რომ 2018 წლის 5 დეკემბრის მონაცემით პროგრამის დანახარჯი იყო მხოლოდ 592 ათასი ლარი, ხოლო შემდეგ 3 კვირაში, წლის ბოლომდე, გაიხარჯა 7 მილიონ 600 ათასი ლარი?
-
კიდევ ერთხელ მივმართავთ აუდიტის სამსახურს შესწავლილი იქნას ამ პროგრამის ეფექტიანობა და გამოვლენილი ხარვეზები, რათა 2019 წელს პროგრამაზე გამოყოფილი თანხები გაიხარჯოს მიზანმიმართულად და რაც შეიძლება ბევრმა ბენეფიციარმა ისარგებლოს ამ პროგრამით“- აცხადებს სერგო ჩიხლაძე თავის მიმართვაში.“
სერგო ჩიხლაძე ასევე ხაზს უსვამს შემდეგ ფაქტს, რომ ჯიბიდან გადახდის წილი და წამლებზე დანახარჯები კვლავ რჩება ყველაზე მძიმე გამოწვევად მოსახლეობისთვის. ჯანდაცვაზე გაწეული ხარჯების ძირითადი წილი (69%) კი მედიკამენტებზე მოდის.
შეგახსენებთ, რომ ნაცვლად მინისტრის მიერ დაანონსებული 200 000 ადამიანისა, ქრონიკული დაავადებების სამკურნალო მედიკამენტების პროგრამის ფარგლებში, 2017 წელს მხოლოდ 13 000 ადამიანი იყო რეგისტრირებული. 2018 წელს კი 22 000 ახალი ბენეფიციარი დარეგისტრირდა. მთავრობის მიერ დაანონსებული ე.წ. “იაფი მედიკამენტების” პროგრამაზე გამოყოფილი თანხები კი ვერ იქნა ათვისებული ვერც 2017 და ვერც 2018 წლებში. ამავე დროს, სერგო ჩიხლაძის აზრით, საეჭვოა პროგრამაზე გამოყოფილი თანხების ხარჯვის დინამიკაც.
