დღეს გამართულ საგანგებო ბრიფინგზე “ერთიანი ნაციონალური მოძრაობის” თავმჯდომარე გრიგოლ ვაშაძემ, თავისი პარტიისა და გაერთიანებული ოპოზიცია “ძალა ერთობაშიაში” შემავალი სუბიექტების სახელით განცხადება გააკეთა და საზოგადოებას პრემიერ-მინისტრობის კანდიდატად საქართველოს მესამე პრეზიდენტი, მიხეილ სააკაშვილი წარუდგინა:
“მინდა გაუწყოთ, რომ “ერთიანი ნაციონალური მოძრაობის” პოლიტსაბჭომ და გაერთიანებული ოპოზიციის “ძალა ერთობაშიაში” შემავალმა ყველა პარტიამ ერთხმად მიიღო გადაწყვეტილება, წარმოვადგინოთ, როგორც პრემიერ-მინისტრობის კანდიდატი, საქართველოს მე-3 პრეზიდენტი – მიხეილ სააკაშვილი. იმისთვის, რომ სწორად მოხდეს გადაწყვეტილების გაანალიზება და ამ გადაწყვეტილების მთელი მნიშვნელობა რომ გავიგოთ, უნდა გავიხსენოთ, რა სახელმწიფო ჩაიბარა მიხეილ სააკაშვილმა 2003 წელს.
ჩვენ ვლაპარაკობთ საქართველოზე, რომლისგანაც არაფერი აღარ იყო დარჩენილი. ჩვენ ვლაპარაკობთ სახელმწიფოზე, სადაც მართვის მოწმობასა და საზღვარგარეთ წასასვლე პასპორტზე ნიხრი იყო დაწესებული და ერთი ციცქნა ცნობისათვისაც კი მოქალაქეებს თვეობით უწევდათ ხვეწნა ჩინოვნიკისადმი და მისთვის ქრთამის მიცემა. იქ, სადაც არ იყო პოლიცია, არმია, სეკვესტრირებული იყო ბიუჯეტი, ვერ ხერხდებოდა ხელფასების გაცემა, განადგურებული იყო ეკონომიკა, ჩაბნელებული და გაყინული იყო ქვეყანა.
ყველაფერი მნიშვნელოვანი, რაც დღესაც ემსახურება საქართველოს, შეიქმნა მიხეილ სააკაშვილის ადმინისტრაციის მმართველობის დროს – დროშა, გერბი, ჰიმნი, არაკორუმპირებული პოლიცია, არმია, ეფექტური ინსტიტუტები, 4-ჯერ გაზრდილი ეკონომიკა, 11-ჯერ გაზრდილი ბიუჯეტი, უსაფრთხოება, წელში გატეხილი კრიმინალი, თითქმის ამოძირკვული პოლიცია, ეს ყველაფერი იმ წლების მიღწევაა,” – აღნიშნა გრიგოლ ვაშაძემ.
