“ნუ მოკლავ ჭიათურას”, ამ სლოგანით მდუმარე აქცია-პერფორმანსი ჭიათურაში გაიმართა. აქციის მონაწილეები ქალაქის ცენტრში შეიკრიბნენ და ჭიათურაში ყველა მიმართულებით შექმნილი უმძიმესი პრობლემები გააპროტესტეს.
აქციაზე გამოტანილ ფოტოებზე ის 11 საბაგირო გზა იყო ასახული, რომლებიც ჭიათურაში 2019 წელს გააჩერეს და დღემდე არ ფუნქციონირებს. ფოტოებზე ასევე მუნიციპალიტეტში არსებული კატასტროფული ეკოლოგიური მდგომარეობაა გადმოცემული. აქციის მსვლელობის დროს მოქალაქეებს შეეძლოთ აეღოთ ფოტო და რამდენიმე წუთით ახალგაზრდების პროტესტისთვის სოლიდარობა გამოეხატათ. აქციის ორგანიზატორები – არასამთავრობო ორგანიზაცია “GMC – მმართველობის მონიტორინგის ცენტრისა” და საზოგადოებრივი მოძრაობა “მომავლის ჭიათურას” წევრები აცხადებენ, რომ მსგავს პერფორმანსებსა და საზოგადოების ინფორმირებულობას პერმანენტულად გააგრძელებენ.
ცნობისთვის, ჭიათურაში საბაგიროების მშენებლობაზე 40 მილიონ ლარზე მეტი უკვე დაიხარჯა. პროექტი, რომელიც 2016 წელს დაიწყო, 2017 წელს უნდა დასრულებულიყო, მაგრამ მშენებლობა დღემდე გრძელდება. მშენებლობის დასრულება სულ მცირე ოთხჯერ გადაიდო, მიუხედავად იმისა, რომ კონტრაქტორი კომპანია არ შეცვლილა.
ლიკა დევდარიანი
სააგენტო “პარალელის”
რეგიონალური კორესპონდენტი
