ქუთაისში ახალგაზრდა ქალის მკვლელობაში ბრალდებულ ბ.კ.-ს საქალაქო სასამართლომ აღკვეთის ღონისძიების სახით ორ თვიანი წინასწარი პატიმრობა შეუფარდა. შემდეგი მოსმენა 10 სექტემბერს ჩანიშნა. დაკავებულს გამოძიება109-ე მუხლის მესამე ნაწილის “ბ” ქვეპუნქტით ედავება, რაც დამამძიმებელ გარემოებაში განსაკუთრებული სისასტიკით განზრახ მკვლელობის ჩადენას გულისხმობს.
როგორც ბრალდებულის ადვოკატი ესმა ნორაკია განმარტავს, მისი დაცვის ქვეშ მყოფის ჯანმრთელობის მდგომარეობა მძიმეა და არ გამორიცხავს, რომ ფსიქიატრიული ექსპერტიზა გახდეს საჭირო.
“ის არის მძიმე მდგომარეობაში და სამედიცინო დახმარებას საჭიროებს. თუ რა ტიპის პრობლემა აქვს ვერ ვიტყვი. ყოველგვარი ეჭვის გამორიცხვის თვალსაზრისით, არ შევეწინააღმდეგეთ ბრალდების მხარის მიერ პატიმრობის მოთხოვნას. წარდგენილ მძიმე ბრალდებებთან დაკავშირებით შემდგომში დავაყენებთ შუამდგომლობებსა და საგამოძიებო მოქმედებებს. ამ ეტაპზე ის წარდგენილ ბრალდებას არ ეთანხმება,” – ამბობს ესმა ნორაკია.
გარდაცვლილის ოჯახის წევრები 45 წლის ქალის უმკაცრესად დასჯას მოითხოვენ.
შეგახსენებთ, 31 წლის ქალის მკვლელობის ბრალდებით ერთი ქალია დაკავებული, ხოლო დანაშაულის შეუტყობინებლობისთვის – 2 მამაკაცი. შესაძლოა ბრალდებულთა წრე გაიზარდოს.
ახალგაზრდა ქალი, საკუთარ საცხოვრებელ ბინაში 18 ივლისს მოკლეს, გარდაცვლილს 16 ჭრილობა გულ-მკერდისა და კისრის არეში აქვს მიყენებული.
ლიკა დევდარიანი
სააგენტო “პარალელის”
რეგიონალური კორესპონდენტი
