”ლელო საქართველოსთვის“ პოლიტიკური პარტიის ლიდერმა ბადრი ჯაფარიძემ პოლიტპატიმარ გიორგი რურუას საქმესთან დაკავშირებით განცხადება გაავრცელა და სამართლიანი არჩევნების ჩატარებისთვის ერთ-ერთ მთავარ ბერკეტად მისი გათავისუფლება დაასახელა.
ბადრი ჯაფარიძემ აღნიშნა, რომ ისევე, როგორც საბჭოური ქვეყნები, არც ”ქართული ოცნება“ აღიარებს პოლიტპატიმრის არსებობას, შესაბამისად მმართველი ძალის მხრიდან იმის თქმა, რომ ქვეყანას არ ჰყავს პოლიტპატიმარი არის არარეალური:
„მმართველი გუნდის განცხადება ქვეყანაში პოლიტპატიმრების არ არსებობის შესახებ რეალობას არის აცდენილი. ჯერ კიდევ საბჭოთა კავშირის დროიდან, არცერთ ხელისუფლებას არ უღიარებია პოლიტიკური პატიმრების არსებობა. თუმცა, ისე, როგორ მაშინ, დღეს ”ქართული ოცნების” განცხადების საპასუხოდ, მთელი მსოფლიო საუბრობს და წერს ჩვენი ქვეყნის პოლიტპატიმრებზე.
ისინი მოუწოდებენ ქვეყნის ხელისუფლებას, შეწყვიტონ მართლმსაჯულების პოლიტიკური ნიშნით გამოყენება, რაც ქვეყნის რეპუტაციას ანგრევს,“ – განაცხადა ბადრი ჯაფარიძემ.
”ლელო საქართველოსთვის“ ლიდერმა, ევროატლანტიკურ სტრუქტურებში ინტეგრირების მოსალოდნელი შეფერხება დააანონსა, რომლის გამომწვევ მიზეზად კვლავ პოლიტპატიმრების არსებობა დაასახელა და განმარტა, რომ არცერთ განვითარებულ სახელმწიფოს არ სურს ითანამშრომლოს ისეთ ქვეყანასთან, რომელიც მართლმსაჯულებას პოლიტიკური ნიშნით იყენებს.
”8 მარტის შეთანხმების შესრულება ხელისუფლების ინტერესში უნდა შედიოდეს, რადგან ამ საკითხის ასე ღიად დატოვება აზიანებს ქვეყანას და თავად ხელისუფლებას. პრობლემა უნდა გადაწყდეს, იმისთვის, რომ ქვეყანაში მშვიდობიანი და სამართლიანი არჩევნები ჩატარდეს, რადგან სადაც პოლიტპატიმრები არიან, იმ ქვეყანასთან თანამშრომლობის გაღრმავება არცერთ ნორმალურ სახელწიფოს არ სურს. ხელისუფლების ასეთი ნაბიჯები აფერხებს ჩვენი ქვეყნის ინტეგრირებას ევროატლანტიკურ სტრუქტურებში,“ – აღნიშნა ბადრი ჯაფარიძემ.
ავტორი
ქეთა გაბრიაძე
