გრიგოლ ვაშაძის მხრიდან ტოლობის ნიშნის დასმა, დავით ჭიჭინაძესა და გიორგი ვაშაძეს შორის არასწორად მიაჩნია „ევროპული საქართველოს“ ერთ-ერთ ლიდერს გიგი უგულავას და აღნიშნავს, რომ ოპოზიციური სპექტრი მხარს უჭერს გიორგი ვაშაძეს ისნის რაიონში მაჟორიტარობის კანდიდატად. მმართველი პარტიის ოპონენტი ასევე აცხადებს, რომ ჯერ კიდევ გასარკვევია დავით ჭიჭინაძე ოპოზიციაშია თუ სუს-ის ტროას ცხენია:
„ერთიანი მაჟორიტარების შერჩევა იმ მიზნით ხდება, რომ ოპოზიციამ პირველივე ტურში მოუგოს „ქართული ოცნების“ კანდიდატს. ისნის რაიონში ერთიანი ოპოზიციური კანდიდატი არის გიორგი ვაშაძე. მას მხარს ვუჭერთ ყველა ძირითადი ოპოზიციური პარტია, მათ შორის ენმ-ც.
ამიტომ, არასწორად მიმაჩნია ბატონი გრიგოლ ვაშაძის მხრიდან ტოლობის ნიშნის დასმა გიორგი ვაშაძესა და დავით ჭიჭინაძეს შორის, რომელიც კიდევ გასარკვევია ოპოზიციაშია თუ სუს-ის ტროას ცხენია.
არასწორია, მეორე ტურში თანაბარ მხარდაჭერაზე საუბარი ამ კონტექსტში. მოვუწოდებ ჩემს კოლეგებს, პატივისცემის დადასტურებით, ვიყოთ ერთგულნი და ცხადი ჩვენს მოწოდებებში, რომ არ დავაბნიოთ ჩვენი ამომრჩევლები. ჩვენ, “ევროპული საქართველო” თანაბრად ვუჭერთ მხარს ყველა შერჩეულ ერთიან კანდიდატს,” – განაცხადა გიგი უგულავამ.
ავტორი
თამთა ასლანიშვილი
