არჩევნების თარიღის სავარაუდოდ გადატანას ეხმაურება „ახალი საქართველოს“ ლიდერი გიორგი ვაშაძე და აცხადებს, რომ ჯანმრთელობით პოლიტიკური მანიპულირება არის ძალიან ბინძური საქმე. ოპოზიციონერი ლიდერის განმარტებით დღეის მდგომარეობით არ არსებობს საფრთხე არჩევნების გადატანის და ეს მხოლოდ და მხოლოდ „ქართული ოცნების“ მზაკვრული გეგმაა:
„ჯანმრთელობა – რა თქმა უნდა უპირველეს ყოვლისა, მაგრამ ჯანმრთელობით პოლიტიკური მანიპულირება არის ძალიან ბინძური საქმე. „ქართული ოცნება“ როგორც ჩანს ფიქრობს, რომ ალტერნატიული გეგმაც ჰქონდეთ. თუ მათ ძალიან მძიმე სურათი ექნებათ ოქტომბერში საკუთარი რეიტინგისთვის და ეს ცალსახაა იმიტომ, რომ ყოველდღიურად საშინელი ვარდნა ხდება მათი მხარდაჭერის მხრივ, რადგან არაფერი არ გააკეთეს შიმშილის ზღვარზე მისული ადამიანების დასახმარებლად.
„ქართული ოცნების“ წევრები შეეცდებიან, რომ მანიპულაცია მოახდინონ საარჩევნო თარიღით, როგორც ჩანს სწორედ ეს მზაკვრული გეგმა აქვთ შემუშავებული. არცერთ შემთხვევაში ჩვენ არ უნდა მივცეთ ამ გეგმით მანიპულაციის შესაძლებლობა.
31 ოქტომბერს არის დანიშნული არჩევნები და დღეის მდგომარეობით არანაირი საფრთხე არ ემუქრება არჩევნებს. მოვუწოდებ, რომ ზედმეტ აჟიოტაჟს ნუ ატეხავენ იმიტომ, რომ ჩვენ ძალიან დეტალურ მონიტორინგს ვუწევთ კორონავირუსის პროცესსაც,“ – აცხადებს გიორგი ვაშაძე.
ავტორი
თამთა ასლანიშვილი
