თბილისში, ვარკეთილის ქუჩაზე სპეცოპერაცია მიმდინარეობს. როგორც შსს საპატრულო პოლიციის დეპარტამენტის დირექტორმა მედიასთან საუბრისას განაცხადა, საცხოვრებელი სახლის ერთ-ერთი კორპუსის პირველი სართულიდან, სავარაუდოდ ალკოჰოლის ზემოქმედების ქვეშ მყოფმა მამაკაცმა, რამდენიმე უმისამართო გასროლა განახორციელა. მიმდინარეობს მოლაპარაკებები ამ ადამიანთან. ვაჟა სირაძის განმარტებით, მოსახლეობისა და ოჯახის წევრების უსაფრთხოება დაცულია:
„ამ ეტაპისათვის პიროვნება არის შეიარაღებული, სავარაუდოდ ნასვამ მდგომარეობაში. ჩაკეტილია საცხოვრებელი სახლის პირველ სართულზე, საიდანაც უმისამართოდ რამდენიმე გასროლა მოახდინა.
სამართალდამცავი ორგანოს წარმომადგენლები მობილიზებულები არიან პერიმეტრზე, მოსახლეობის უსაფრთხოება დაცულია. ამ ეტაპისათვის მიმდინარეობს მოლაპარაკებები, დამატებით გაცნობებთ, რომ დაშავებული არავინ არ არის და კონკრეტულად არავის მიმართ არ განუხორციელებია გასროლა.
ოჯახის წევრები, შვილები და მეუღლე უსაფრთხოდ არიან. მამაკაცი მარტო არის ჩაკეტილი საცხოვრებელი სახლის პირველ სართულზე, საიდანაც ახორციელებს გასროლას. ამ ეტაპისათვის ამ ადამიანთან მიმდინარეობს მოლაპარაკებები, როგორც პირადად, ასევე სატელეკომუნიკაციო საშუალებებით“, – განაცხადა ვაჟა სირაძემ.
P.S. ვარკეთილში სპეცოპერაცია უკვე დასრულდა. დადგენილი და დაკავებულია პიროვნება, ვინც განახორციელა უმისამართო გასროლა. ის გახლავთ დავით ივანოვი, რომელზეც, გავრცელებული ინფორმაციით, შემაკავებელი ორდერი იყო გამოწერილი ოჯახის წევრებთან მიმართებაში.
თამთა ასლანიშვილი