„ჩემს უკან წარწერა „ძალა ერთობაშია“ – ღრმა შინაარსს ატარებს. შესაბამისად მთავარი ის კი არ არის რა უნდა გიორგი ვაშაძეს ან რომელიმე პარტიას, არამედ მთავარი ის არის რა სჭირდება დღეს საქართველოს!“ – ეს განცხადება პოლიტიკური პლატფორმა „ახალი საქართველოს“ ლიდერმა გიორგი ვაშაძემ ბრიფინგზე გააკეთა და გამოეხმაურა მის პრემიერობასთან დაკავშირებით გაკეთებულ განცხადებებს.
გიორგი ვაშაძის თქმით, მისთვის და მისი „სტრატეგია აღმაშენებლის“ გუნდისათვის მნიშვნელოვანი არ არის თანამდებობა, მათთვის მნიშვნელოვანია, აღმშენებლობის პროცესი და ხალხის გაჭირვებიდან გამოყვანა:
„მე ჩამოვედი დასავლეთ საქართველოდან, სადაც ძალიან ბევრ ადამიანთან მქონდა შეხვედრა. ამ ადამიანების ნომერ პირველი პრობლემა გაჭირვება და შიმშილია, როგორ გამოკვებონ ოჯახები. მეორე, რისი იმედიც მათ აქვთ, – ეს არის ჩვენი ერთიანობის, ურღვევობის და ერთიანი ბრძოლის ფრონტის. აქედან გამომდინარე, ვფიქრობ, რომ რადიკალური პარტიული განცხადებები ამ ერთობას აზიანებს ხალხის თვალში.
პირდაპირ გეუბნებით, რომ მე ყველაფერს გავაკეთებ და არ დავუშვებ ერთიანობის დარღვევას. იმიტომ, რომ გამარჯვება სწორედ ერთიანობაში, ძალა არის ერთიანობაში. ჩვენს მტერს ყველაზე მეტად აშინებს ჩვენი ერთიანობა.
აქედან გამომდინარე პირდაპირ ვამბობ, რომ პოლიტიკაში მოსვლის დღიდან ყოველთვის წინააღმდეგი ვიყავი კულუარული გადაწყვეტილებების და ყოველთვის მომხრე ვიყავი საჯაროობის, აბსოლუტურად ყველა საკითხთან მიმართებაში.
ჩემთვის მნიშვნელობა არ აქვს თანამდებობას და პოზიციას, ჩემთვის პირადად და „სტრატეგია აღმაშენებლის“ გუნდისათვის მთავარი არის ის აღმშენებლობის პროცესი, რომელიც უნდა დავიწყოთ ყველამ ერთად საქართველოში, რომ ამ უზარმაზარი უკიდეგანო პრობლემებიდან გამოვიყვანოთ ქვეყანა.
რაც შეეხება პრემიერობის საკითხს, გულწრფელდ გეტყვით, რომ ძალიან გამიკვირდა გუშინ გაკეთებული რადიკალური განცხადებები. ერთი მხრივ საუბარია, რომ არ გაგვიხილავს საკითხი, მეორე მხრივ კი რადიკალური განცხადებები. მე ჩემი კანდიდატურა პრემიერობაზე ჯერ არ დამიყენებია გაერთიანებული ოპოზიციის ფორმატში. ეს იყო გარკვეული ადამიანების მოსაზრებები.
კიდევ ერთხელ ყველას მინდა ვუთხრა და დავამშვიდო, რომ ვერცერთ შემთხვევაში დისონანსს, თუნდაც ესეთი განცხადებები, ვერ შეიტანს ჩვენს ერთიანობაში, იმიტომ, რომ საქართველოს გამარჯვება არის ერთიანობაში. საქართველოს გამარჯვება არის ერთად დგომაში. ძალაში, რომელშიც ჩვენ უნდა გავაერთიანოთ და ერთიანი გზით წავიდეთ.
რაც მთავარია, ვფიქრობ, რომ “ძალა ერთობაშიას” პოლიტიკურ ბლოკს აუცილებლად უნდა ჰყავდეს პრემიერობის კანდიდატიც და აუცილებლად უნდა დაასახელოს გუნდიც, იმიტომ, რომ ხალხი ხმას აძლევს კონკრეტულ დაპირებებზე პასუხისმგებელ ადამიანებსაც. როგორ უნდა მოხდეს ეს ყველაფერი? ფართო საზოგადოებრივი დისკუსიის, ყველას ჩართულობით იმისათვის, რომ შევთანხმდეთ არა იმაზე – მე რა მინდა, არამედ საქართველოს რა სჭირდება, ჩვენს ქვეყანას რა სჭირდება, საზოგადოების მხრიდან ვის აქვს მეტი ნდობა. აქედან გამომდინარე, დავმშვიდდეთ ყველაფერი ძალიან სწორად მიდის დღიდან ამ გაერთიანების ჩამოყალიბებისა.
ჩვენ გეგმა ზომიერად და სტრატეგიულად ვმუშაობთ, ამიტომ ყველას ვთხოვ ნუ შევიტანთ დისონანსს გაერთიანებაში, ნუ გავაკეთებთ იმ საქმეს, რომელიც ჩვენს ოპონენტებს და მტრებს უნდათ“, – განაცხადა გიორგი ვაშაძემ.
ავტორი
თამთა ასლანიშვილი
