საქართველოს პრეზიდენტმა პირველი პრეს-კონფერენცია გამართა, სადაც ქვეყნის შიდა და გარე გამოწვევებზე ისაუბრა და ჟურნალისტების შეკითხვებს უპასუხა.
ნოვაციების, ქველმოქმედებისა და საინტერესო ინიციატივების განხორციელების მიზნით დაანონსდა პრეზიდენტის ახალი ფონდის შექმნა, რომელიც დაფუძნებული იქნება საზოგადობრივ და კერძო საწყისზე. პრეზიდენტი საკუთარ ხელფასს სწორედ ამ ფონდს შესწირავს.
აღნიშნა, რომ პრეზიდენტის ადმინისტრაცია მზადაა, საზოგადოებასთან და არასამთავრობო ორგანიზაციებთან ერთად აქტიური დისკუსია გამართოს ცილისწამების შესახებ კანონთან დაკავშირებით, რომლის შემოღებაც საჭირო და უკვე დანერგილი პრაქტიკაა არაერთ ევროპულ ქვეყანაში.
პრეზიდენტმა განაცხადა, რომ მისი მთავარი მიზანი იქნება საქართველო უფრო აქტიურად იყოს წარმოდგენილი მსოფლიო რუკაზე ყველა მიმართულებით.
სალომე ზურაბიშვილმა უკრაინის ეკლესიის ავტოკეფალიასთან დაკავშირებითაც უპასუხა ჟურნალისტის კითხვას და აღნიშნა, რომ თუ საქართველოს ეკლესია და საპატრიარქო ფრთხილობენ, რაღაც შედეგების გამო, არ შეიძლება, რომ ის, როგორც საქართველოს პრეზიდენტი იყოს ნაკლებად პასუხისმგებლიანი და გააკეთოს ხმამაღალი განცხადება, როგორც პრეზიდენტმა.
“მოსამართლეთა სიის” შეესახებ პრეზიდენტმა აღნიშნა, რომ მას არ აქვს უფლება ისაუბროს კონკრეტულ გვარებზე, მაგრამ ხაზი გაუსვა, რომ სასამართლოს რეფორმა არის უმნიშვნელოვანესი საკითხი და მის მიმართ მიღწეულ უნდა იქნას უდიდესი ნდობა, რაც ქვეყნის განვითარების ერთ-ერთი მთავარი საწინდარია.
საქართველოს პრეზიდენტმა “ლუგარის” ლაბორატორიის წინააღმდეგ, სოციალური ქსელებით, აგორებულ ნეგატიურ ინფორმაციას რუსული პროპაგანდის ნაწილი უწოდა და აღნიშნა, რომ ეს ლაბორატორია უდიდესი სიკეთის მომტანია ჩვენი ქვეყნისთვის და საზოგადოებას ამ საკითხთან დაკავშირებით სიფრთხილისაკენ მოუწოდა.
საქართველოს პრეზიდენტის პრეს-კონფერენცია ათონელის სასახლეში დაახლოებით ერთი საათის განმავლობაში მიმდინარეობდა.
