ავტომანქანების განბაჟებასთან დაკავშირებით მიღებულ გადაწყვეტილებას ეხმიანება პოლიტიკური პლატფორმა “ახალი საქართველოს” პოლიტსაბჭოს წევრი, თამთა შამათავა და ხელისუფლებისგან მოითხოვს სამართლიანობის დაცვას:
“მივმართავ ხელისუფლებას, მორჩნენ კეკლუცს და ძალაუფლებით ტკბობას. მიიღონ შესაბამისი გადაწყვეტილება, რათა განბაჟების საშეღავათო პერიოდი დაწესდეს პირველი აპრილის შემდგომ შემოსული მანქანებსთვისაც.
სრულიად აბსურდული და გაუგებარია, რატომ ეხება შეღავათები მხოლოდ პირველ აპრილამდე ჩამოსულ ავტომანქანებს, აპრილის მერე კოვიდ-19 გაქრა, თუ ხალხი უმუშევარი აღარაა?! დანაშაულია მსგავსი გულგრილი მიდგომა საკუთარი მოქალაქეების მიმართ,” – თამთა შამათავა.
“ახალი საქართველოს” პოლიტსაბჭოს წევრი, აღნიშნულ რეგულაციას აბსურდულს უწოდებს. საუბარია ფინანსთა მინისტრის 17 მარტის ბრძანებაზე, რომლის თანახმადაც პირველ აპრილამდე ჩამოსულ ავტომანქანებს განბაჟების ვადა პირველ სექტემბრამდე გაუხანგრძლივდა. მისი თქმით, გაუგებარია, თუ რატომ შეირჩა საშეღავათო თარიღად პირველი აპრილი:
“გაუგებარია რა გათვლებით შეირჩა თარიღი 1 აპრილი, როცა რეალურად აპრილის მერე კრიზისი უფრო გამწვავდა – გაჩერდა ეკონომიკა, დაიკეტა სამუშაო ობიექტები და შესაბამისად, ხალხმა დაკარგა შემოსავალი.
პარადოქსია, მაგრამ შეღავათი შეეხოთ მათ, ვისაც შესაძლოა ნაკლებად სჭირდებოდათ ეს, ხოლო ადამიანებს, ვისაც რეალურად სჭირდება დახმარება, დაკეტილი ეკონომიკისა და საგანგებო რეჟიმის პირობებში, აღნიშნული შეღავათი არ ეხებათ.
ეს არის ხელისუფლების მხრიდან გადადგმული მორიგი გაუაზრებელი და მოუმზადებელი გადაწყვეტილება. მით უფრო, რომ 1 აპრილის მერე არათუ იკლო პანდემიამ არამედ, უფრო გამწვავდა,” – აღნიშნავს თამთა შამათავა.
ოპოზიციური პარტიის წარმომადგენლის თქმით, ადამიანები შიმშილის ზღვარზე არიან და ქვეყნის მასშტაბით, ასეთი ადამიანების რაოდენობა, მატულობს:
“უმუშევრად დარჩა 150 000-მდე ადამიანი და შესაძლოა ეს რიცხვი 500 ათასამდე გაიზარდოს. ადამიანები შიმშილის ზღვარზე არიან, გაჩერებულია ეკონომიკა და არანაირი ნიშანწყალი კრიზისიდან გამოსვლის არ ჩანს. პირიქით, შეჭირვებული ადამიანების რაოდენობა ყოველდღიურად იზრდება,” – განაცხადა თამთა შამათავამ.