თავდაცვის მინისტრის ყოფილი მოადგილე, იურისტი ანა დოლიძე, ტელეკომპანია „პირველთან“ ინტერვიუს დროს რამდენიმე მნიშვნელოვან საკითხზე ამახვილებს ყურადღებას, მათ შორის საქართველოს მესამე პრეზიდენტის მიხეილ სააკაშვილის უკრაინაში შესაძლო ვიცე-პრემიერად დანიშვნას და მის მიმართ საქართველოში „ქართული ოცნების“ მხირდან გაკეთებულ განცხადებებზე. იურისტი აღნიშნავს, რომ ამ თემით აპელირება არის კიდევ ერთი მცდელობა, რომ საზოგადოებას ყურადღება გადაატანინონ, ისეთ თემებზე, რომელიც არ არის მნიშვნელოვანი და წესით 10 წლის წინ უნდა დასრულებულიყო:
„იმხელა გამოწვევის წინაშე დგას ჩვენი ქვეყანა, რომელიც მას რამდენიმე ათწლეულის განმავლობაში არ ჰქონია, ალბათ 90-იანებს რაც გამოვცდით მას შემდეგ, თუნდაც აგვისტოს ომის შემდეგ. დეკადაში ერთხელ არის ამ ტიპის გამოწვევა. მსოფლიოს უმეტესი ქვეყნები, რუსეთი, რომელიც უკვე საკმაოდ ჩამორჩენილია მეცნიერული თვალსაზრისით, ცდილობს მოიგონოს ვაქცინა, ერთმანეთს ეჯიბრებიან რომელი უფრო სწარფად გაფრინდება კოსმოსში, შენი ქვეყნის მოსახლეობის უმეტესი ნაწილი ფაქტობრივად დარჩენილია ულუკმაპუროდ და ამ პირობებში ჩვენი ხელისუფლება, არ დაგვავიწყდეს რომლის ხელფასებსაც ჩვენ ვიხდით, დასდევს მიხეილ სააკაშვილის კარიერულ საფეხურებს.
ძალიან მნიშვნელოვანია, რომ ყველამ კარგად გაიგოს, ეს არის საშუალება ჩვენი ხელისუფლების მხრიდან, რომ გადაფაროს, გვერდზე გაიტანოს, ყურადღება დაგვაკარგვინოს, რომ მის წინაშეა უსერიოზულესი კრიზისი და უსერიოზულესი გამოწვევები.
ამის ფონზე ყოფილი პრეზიდენტის, რომელიც მათ არ დაიჭირეს სხვათაშორის თავის დროზე და რამდენიმე მისი ამფსონი, მათ შორის ზურაბ ადეიშვილი, მისი დევნა, ამასთან დაკავშირებით განცხადებების კეთება, ჩვენი პრეზიდენტის მხრიდან, რომელიც ტელევიზორთან უნდა იჯდეს და აქტიურად მსჯელობდეს იმაზე, შიმშილიდან როგორ უნდა გამოვიყვანოთ ქვეყანა, ეს არის მორიგი მცდელობა ყურადღება გადაგვატანინონ ისეთ თემებზე, რომელიც წესით დამთავრებული უნდა იყოს 10 წლის წინ,“ – აცხადებს ანა დოლიძე.
ანა დოლიძე ასევე საუბრობს კანონის წინაშე თანასწორობის პრინციპზე, რომელიც საქართველოში დარღვეულია და იკვეთება ორი კლასტერი, ერთი რომელიც კანონმორჩილია და იცავს დადგენილ წესებს და მეორე – პრივილეგირებულები ხელისუფლების მხრიდან, რომლებიც არ ემორჩილებიან კანონს:
„წესით დემოკრატიულ საზოგადოებაში დასაყრდენი პრინციპი კანონის წინაშე თანასწორობაა, ყველასთვის, მიუხედავად პოლიტიკური, პარტიული მდგომარეობისა, მიუხედავად ძალაუფლებისა, მიუხედავად ანაფორისა, ყველა თანასწორი უნდა იყოს კანონის წინაშე, მაშინ ჩვენ გვიმყარდება კანონის მიმართ ნდობა, და მაშინ ადამიანები სანქციებს აღარ ებრძვიან მათ მიმართ, თუ ისინი ხედავენ, რომ ჩვენს გვერდზე, რომ მეზობელი ცხოვრობს, რომელსაც შავი ჯიპი ემსახურება ისიც ისევე ითვალისწინებს კანონს, რომელსაც მე უნდა დავექვემდებარო, მაგრამ „ქართული ოცნება“ აზიანებს ამ პრინციპს თანამდებობაზე მოსვლის დღიდან.
ბატონი ცინარიძის შემთხვევაში, როდესაც მისი გვარი ამოტივტივდა, აუციელებელი უნდა ყოფილიყო გენერალური ინსპექციის დასკვნა და ამ დასკვნის შედეგად გამოსულიყო გარკვეული სანქცია, აქ იკვეთებოდა თავიდანვე ნიშნები, რომ რატომღაც ის და არა 10 ათასობით სხვა პოლიციელის გვარი დასახელდა ქალბატონთან მომხდარ ინციდენტში, აუცილებელი იყო მყისიერი რეაქცია და რაღაცა სანქცია, იმისათვის, რომ ჩვენ არ გვენახა, არ გაგვეგო ეს გვარი სხვა კიდევ ნეგატიურ სიტუაციასთან მიმართებაში.
მაგალითად ქალაბტონი მარიანა ჩოლოიანი, რომელიც იკვეთებოდა მასობრივი წამების საკითხთან, რამდენიმე ადამიანი ეწამა ყინწვისის საქმეში და მიუხედავად ამისა არასრულწლოვანის დაკითხვაზე იყო დაშვებული. იგივე ბატონი ილია ჯიშკარიანი „ქართული ოცნების“ გამგებელი, ასევე ოთარ ფარცხალაძე, ბრალდებული ძალიან გავლენიანი პირი, რომლის საქმე ახლაც მიმდინარეობს და ვხდევათ, რომ ქუჩაში დადის და საშვიც ჰქონია, ვინ გაბედავს მის გაჩერებას ამ ხელისუფლების პირობებში. ლევან იზორიას ძმა…
სახეზეა გამოძიების არაეფექტურობა, რომელიც არის შედეგი, ანუ გამოძიებას არ მოაქვს ჩვენს კითხვებზე პასუხები, მიზეზი არის პრინციპი პრივილეგირებული პირებისა, რომელსაც ამკვირდებს „ქართული ოცნება“ და რაც ძალიან კარგად დავინახეთ მაშინ, როდესაც მანქანებით გადაადგილება იყო აკრძალული. ცალსახად გამოჩნდა გამოიკვეთა ორი კლასტერი აქეთ ფარცხალაძეები-ჯიშკარიანების საშვიანი ხალხის და მეორე მხარეს ჩვეულებრივი საქართველოს მოქალაქეების, რომლებიც კანონმორჩილნი სახლში ელოდებიან როდის მოიხსნება შეზღუდვები. ეს არის ამ ხელისუფლების მართვის ერთ-ერთი ბერკეტი, რაც ჩვენ აუცილებლად უნდა შევცვალოთ,’’ – აცხადებს ანა დოლიძე ტვ „პირველზე“, ჩართვისას.
ავტორი
თამთა ასლანიშვილი
