“ქართულ ოცნებას” სურს რომ სტატისტიკით მანიპულაცია მოახდინოს და ამიტომ არ აკეთებენ სწრაფ ტესტირებას – გიორგი ვაშაძე

„ახალი საქართველოს“ თავმჯდომარე გიორგი ვაშაძე აცხადებს, რომ საქართველოში მასიური/საყოველთაო ტესტირება მიზანმიმართულად არ ტარდება, მიზეზი კი პოლიტიკური ქულების ჩაწერაა და „ქართულ ოცნებას“ ზედამხედველის ფუნქცია გაუტკბა. ოპოზიციონერი ლიდერი ასევე განმარტავს, რომ ხელისუფლება სტატისტიკით მანიპულირებს და ექიმების პოლიტიკური განცხადებების უკან არიან ამოფარებულები:

“ის, რომ საქართველოში არ ხდება მასიური, საყოველთაო ტესტირება ეს მიზანმიმართულად, გამიზნულად ხდება და ამას აქვს კონკრეტული მიზეზი:

პირველი – ფიქრობენ, რომ ციფრებს შეინარჩუნებენ, რათა მერე ილაპარაკონ, რომ კარგად ებრძოლეს კორონავირუსს

და მეორე – ზედამხედველის ფუნქცია, რომელიც გაუტკბა “ქართულ ოცნებას” და უნდა, რომ მაქსიმალურად გაწელოს.

სამწუხაროა, რომ ექიმები იჭრებიან პოლიტიკაში და პოლიტიკურ განცხადებებს აკეთებენ – ეს ძალიან ცუდია და ამ პოლიტიკურ განცხადებებს უკან ეფარება “ქართული ოცნება” რაც კიდევ უფრო ცუდია.

ბოლო დღეებში გამოჩნდა და ბოლომდე ფარდა აეხადა, თუ რას თაღლითობს “ქართული ოცნება”. ერთადერთი მათი ამოცანა არის საზოგადოების გარკვეულ ნაწილში მაინც ჩაიწერონ ქულები. მათ უნდათ, რომ სტატისტიკით მანიპულაცია მოახდინონ და ამიტომ არ აკეთებენ სწრაფ ტესტირებას, რათა სწრაფად არ დადგინდეს ვინ არის ინფიცირებული, რომ გავრცელების არეალი შეიზღუდოს და სტატისტიკას ამოეფარონ,” – აცხადებს გიორგი ვაშაძე.

ავტორი
თამთა ასლანიშვილი