საქართველოში კორონავირუსით გარდაცვლილი მე-6 პაციენტი 83 წლის მამაკაცია. პირველი საუნივერსიტეტო კლინიკის დირექტორის ლევან რატიანის ინფორმაციით, პაციენტს კოვიდ19-თან ერთად აღენიშნებოდა ქრონიკული პათოლოგიები, სხვადასხვა მძიმე დაავადებები. ჩატარებული რეანიმაციული ღონისძიებები აღმოჩნდა უშედეგო და დღეს დილით ბიოლოგიური გარდაცვალება დაფიქსირდა:
„სამწუხარიდ, ბატონი რომელზეც გუშინ ვაცხადებდი, რომ იყო ტერმინალურ მდგომარეობაში დღეს დაფიქსირდა ბიოლოგიური სიკვდილი. ასაკით ბატონი გახლდათ 83 წლის. აღენიშნებოდა ქრონიკული პათოლოგიები, ანამნეზში იყო გულის პათოლოგიები გულის უკმარისობა, მოციმციმე არითმია, ყველა სარქველის ნაკლოვანებით იყო შემოსული და ეს ნაკლოვანება გამოიხატა ჩატარებული ექოსკოპიით. მიუხედავად ჩატარებული ღონისძიებებისა რეანიმაციული ღონისძიება აღმოჩნდა უშედეგო და დღეს დილით დაფიქსირდა ბიოლოგიური სიკვდილი,“ – განაცხადა ლევან რატიანმა.
Stopcov.ge – ს ბოლო მონაცემებით საქართველოში კორონავირუსის დადასტურებული შემთხვევა – 485; მათ შორის გამოჯანმრთელებული – 139; მათ შორის გარდაცვლილი – 6; კარანტინის რეჟიმში – 4928; სტაციონარში მეთვალყურეობის ქვეშ – 522; *უცხოეთიდან სამკურნალოდ გადმოყვანილი საქართველოს მოქალაქეები – 3.
ავტორი
თამთა ასლანიშვილი
