„სამწუხაროა, რომ პანდემიის საფრთხეს ამოფარებულები, ცდილობენ, წლობით შეგვაგუონ შეზღუდვებსა და ზედამხედველობის პირობებში ცხოვრებას“ – ასე ეხმაურება პარტია „ახალი საქართველოს“ თავმჯდომარე გიორგი ვაშაძე მთავრობის მიერ წარდგენილ სოციალურ-ეკონომიკურ ანტიკრიზისულ გეგმას. ოპოზიციონერი ლიდერის განმარტებით მთავრობას კრიზისიდან გამოსვლის არავითარი გეგმა არ გააჩნია, რაც პრემიერის განცხადებებიდან გამოჩნდა და ეს გეგმა მხოლოდ მოსახლეობის გასაჭირით წინასაარჩევნო სპეკულაციაა:
„პრემიერ-მინისტრის დღევანდელი განცხადებებიდან ნათლად გამოჩნდა, რომ არავითარი კრიზისიდან გამოსვლის გეგმა მთავრობას არ გააჩნია. ეს არის მოსახლეობის გასაჭირით წინასაარჩევნო სპეკულაცია.
სამწუხაროა, რომ პანდემიის საფრთხეს ამოფარებულები, ცდილობენ, წლობით შეგვაგუონ შეზღუდვებსა და ზედამხედველობის პირობებში ცხოვრებას და რაც შეიძლება დიდი ხნით ჩვენს ხარჯზე, ჩვენს ზედამხედველებად და მმართველებად დარჩნენ. რაც არ გაამოვა, რა თქმა უნდა .
შეზღუდვებითა და ხალხისთვის გროშების გადაყრით ძალაუფლების შენარჩუნება შესაძლებელი რომ ყოფილიყო, მსგავსი კომუნისტური და საბჭოთა პოლიტიკური სისტემა კრახს არ განიცდიდა. რაც წესით, უნდა იცოდნენ „ქართულ ოცნებაში,“ სადაც დღესაც ბევრი კომკავშირისა და ცეკას ყოფილი ინსტრუქტორია.
ვწუხვარ, რომ ახლა უკვე ორ ფრონტზე – პანდემიასა და ძალაუფლებას დახარბებულ ავტოკრატიულ მმართველობასთან ერთდროულად მოგვიწევს ბრძოლა. რაც ჩვენი ენერგიული, გააზრებული ძალისხმევითა და ერთიანობით საქართველოსა და მისი მოქალაქეების გამარჯვებით დასრულდება,“ – განაცხადა გიორგი ვაშაძე.