გირჩის წევრები იპოდრომზე, მთავრობის მიერ დაწესებულ რიგ შეზღუდვებს აპროტესტებდნენ, საპატრულო პოლიციამ აქციის მონაწილეების ნაწილი განყოფილებაში გადაიყვანეს, ნაწილი დააჯარიმეს ხოლო ნაწილი დააპატიმრეს.
დაჯარიმებულ და ვაკე-საბურთალოს განყოფილებაში გადაყვანილ პირებს შორის არიან როგორც ”გირჩის” წევრები ასევე აქცია-სეირნობის მშვიდობიანი მონაწილეები, ზურაბ ჯაფარიძე, ვახო მეგრელიშვილი, ლევან ჯგერენაია და ვიტალი გეგუჩია.
„გირჩის“ ერთ-ერთმა ლიდერმა იაგო ხვიჩიამ განაცხადა, რომ საპატრულო პოლიციას უსამართლო გადაწყვეტილებების აღსრულება უწევს. მან ასევე აღნიშნა, რომ ”გირჩი” ამ აქციით ყველა მოქალაქის სახელით აპროტესტებს, იმ უსამართლობას რაც დღეს ქვეყანაში ხდება.
საპატრულო პოლიციის თანამშრომლებმა განაცხადეს, რომ მათ ჯარიმის დასაწერად მაგიდა არ ჰქონდათ, რის გამოც იძულებულები გახდნენ მონაწილეები განყოფილებაში გადაეყვანათ.პოლიციის თანამშრომლებმა ასევე განაცხადეს, რომ მათ საუბრის უფლება არ აქვთ და განმარტებებისთვის ”შსს”-ს მიმართონ.“ – აღნიშნულია „გირჩის“ ოფიციალურ საიტზე.
„გირჩის“ წევრები კონკრეტულად აპროტესტებდნენ:
„1. საგანგებო მდგომარეობის და საკომენდანტო საათის გაუქმება
2. მსუბუქი ავტომობილებით გადაადგილებაზე შეზღუდვების მოხსნა
3. ავტომობილში მგზავრების სხდომასა და რაოდენობაზე შეზღუდვების მოხსნა
4. შეკრებასა და მანიფესტაციაზე შეზღუდვების მოხსნა
5. საჯარო სივრცეში 3 ადამიანზე მეტის შეკრებაზე შეზღუდვის მოხსნა
6. სავაჭრო ობიექტებზე, მათ შორის აგრარულ ბაზრებზე, შეზღუდვების მოხსნა
7. ბიზნესზე შეზღუდვების მოხსნა
8. სავალუტო ჯიხურებზე შეზღუდვების მოხსნა
9. ასაკოვანი ადამიანებისთვის სახლიდან გასვლაზე შეზღუდვის მოხსნა
10. ყველა ბლოკ-პოსტის აღება და ყველა მუნიციპალიტეტის გახსნა ქვეყნის მთელ ტერიტორიაზე
11. ყველა ადმინისტრაციული ჯარიმის გაუქმება, რომელიც გამოიწერა კორონავირუსის პანდემიასთან დაკავშირებით შემოღებული შეზღუდვების გაუქმება,“ – ნათქვამია „გირჩის“ ოფიციალურ ვებგვერდზე.
„გირჩის“ აქცია-პერფომანსთან დაკავშირებით განცხადება შინაგან საქმეთა სამინისტრომაც გააკეთა, სადაც აღნიშნულია, რომ პოლიტიკური პარტია „გირჩის“ ლიდერი ზურაბ ჯაფარიძე და ამავე პარტიის 14 აქტივისტი 3000 ლარით დააჯარიმა, 3 პირი კი დაკავებულია:
„საქართველოში ახალი კორონავირუსის გავრცელების აღკვეთის მიზნით გასატარებელი ღონისძიებების დამტკიცების შესახებ“ საქართველოს მთავრობის 2020 წლის 23 მარტის №181 დადგენილების მე-5 მუხლის პირველი პუნქტის შესაბამისად საგანგებო მდგომარეობის მოქმედების ვადით აკრძალულია „შეკრებებისა და მანიფესტაციების შესახებ“ საქართველოს კანონით გათვალისწინებული ნებისმიერი შეკრება ან/და მანიფესტაცია.
საქართველოს კანონმდებლობით „შეკრება“ არის მოქალაქეთა ჯგუფის შეკრება ჭერქვეშ ან გარეთ, მიტინგი საზოგადოებრივი თავშეყრის ადგილებში, სოლიდარობის ან პროტესტის გამოხატვის მიზნით.
შესაბამისად, შინაგან საქმეთა სამინისტრომ საგანგებო მდგომარეობის რეჟიმის დარღვევისთვის, საქართველოს პრეზიდენტის დეკრეტის მე-8 მუხლის შესაბამისად, პოლიტიკური პარტია „გირჩის“ ლიდერი ზურაბ ჯაფარიძე და ამავე პარტიის 14 აქტივისტი 3000 ლარით დააჯარიმა, 3 პირი კი დაკავებულია წვრილმანი ხულიგნობისა და სამართალდამცველების კანონიერი მოთხოვნისადმი დაუმორჩილებლობისთვის, საქართველოს ასკ-ის 166-ე და 173-ე მუხლებით,“ – აღნიშნულია შინაგან საქმეთა სამინისტროს განცხადებაში.
ავტორი
თამთა ასლანიშვილი