საქართველოში კორონავირუსით გარდაცვლილი მე-5 პაციენტი არის 68 წლის მამაკაცი ბოლნისის კლასტერიდან, რომელსაც გადატანილი ჰქონდა მიოკარდიუმის ინფარქტი, და კლინიკაში აპარატულ სუნთქვაზე იყო შეერთებული. ინფორმაცია ამის შესახებ პირველი საუნივერსიტეტო კლინიკის დირექტორმა, ლალი ტურძელაძემ მიაწოდა საზოგადოებას:
„სამწუხარო ამბავი გვაქვს, გარდაიცვალა მე-5 პაციენტი, მამაკაცი 68 წლის, რომელიც ბოლნისის კლასტერიდან იყო. ჩვენთან აპარატურულ სუნთქვაზე იყო უკვე კარგა ხანია.
მოგეხსენებათ, რომ ჩვენთან რეანიმაციაში 9 პაციენტი მკურნალობს, აქედან 7 აპარატულ სუნთქვაზეა, 3 პაციენტი კრიტიკულ-ტერმინალურ მდგომარეობაში. ერთ-ერთი მათგანი იყო ეს პაციენტი, რომელსაც ჰქონდა გადატანილი მიოკარდიუმის ინფარქტი, გულის უკმარისობა, სუნთქვის მწვავე უკმარისობით შემოვიდა ჩვენთან და ამიტომაც მოხდა მისი აპარატზე გადაყვანა. პაციენტს აღენიშნებოდა მიოკარდიუმის ინფარქტის გამო თავისი გართულებები, სასუნთქ გზებშიც გართულებები, რასაც დაემატა ორმხრივი მწვავე პნევმონია, სეფსისი განვითარდა სეფტიური შოკით და სიკვდილის უშუალო მიზეზი იყო ფილტვის არტერიის თრომბოემბოლია. ას გართულება ახასიათებს ძირითადად კორონავირუსს.
ძალიან ბევრი შრომა გასწიეს ჩვენმა რეანიმატოლოგებმა, მაგრამ შედეგი ვერ დადგა კარგი.
ჩვენს კლინიკაში პაციენტი იყო 2 კვირის მანძილზე,“ – განაცხადა ლალი ტურძელაძემ.
Stopcov.ge – ის ბოლო მონაცემებით საქართველოში კორონავირუსის დადასტურებული შემთხვევა – 411; მათ შორის გამოჯანმრთელებული – 98; სულ გარდაცვლილი – 5; კარანტინის რეჟიმში – 5160; სტაციონარში მეთვალყურეობის ქვეშ – 579; ხოლო უცხოეთიდან სამკურნალოდ გადმოყვანილი საქართველოს მოქალაქეები – 3 ადამიანი გახლავთ.
ავტორი
თამთა ასლანიშვილი