საპროტესტო აქციაზე დაკავებული პირების მშობლებმა და ოჯახის წევრებმა სოციალურ ქსელში შექმნეს ფეისბუქის გვერდი – სინდისის პატიმრების თავისუფლებისთვის , სადაც გამოქვეყნდა მათი საერთო განცხადებას საპატიმროდან გამოგზავნილ წერილთან დაკავშირებით, სადაც აღნიშნული იყო, რომ არასასურველად მიიჩნევა ცალკეული პოლიტიკური ფიგურების ბანერების გამოტანა:
,,პირველ რიგში, უდიდეს მადლობას გიხდით ყველას მხარდაჭერისთვის.
უსაზღვროა ჩვენი მადლიერება პროტესტის ყველა იმ მონაწილის მიმართ, ვინც ვერაფრის დიდებით გატეხა რეჟიმმა, ძალადობის, დაშინების, ზეწოლის, რეპრესიებისა და ფიზიკური განადგურების რისკის მიუხედავად.
მართალია, ბიჭებმა ერთმანეთი მხოლოდ დაკავების შემდეგ გაიცნეს, სასამართლო სხდომის დარბაზებსა და ციხის საკნებში, მაგრამ უპირობოა მათი პატივისცემა, თანადგომა და სიყვარული ერთმანეთის მიმართ.
სწორედ ამიტომ, მიგვაჩნია, რომ ყველაფერი, რაც შეიძლება ანაწევრებდეს პროტესტს ან იწვევდეს გაურკვევლობას, ეწინააღმდეგება ჩვენს მიზნებს და ემსახურება მტრის ინტერესებს.
ჩვენი ერთ-ერთი მთავარი მიზანი და სურვილი, კი, ისეთ სახელმწიფოში ცხოვრებაა, სადაც სამართლიანი სასამართლო უზრუნველყოფილი იქნება განურჩევლად ყველასთვის.
ჩვენი ამ სურვილებისა და მიზნების გასაჟღერებლად, შესანიშნავ დღედ მიგვაჩნია საქართველოს დამოუკიდებლობის დღე – 26 მაისი.
გახსოვდეთ, ჩვენი წარმატების ფორმულა, ჩვენს გერბზეა დატანილი – ძალა ერთობაშია”, – ნათქვამია გავრცელებულ განცხადებაში.
