„ჭავჭავაძის კვლევითი ცენტრის” დამფუძნებელი, ზაზა ბიბილაშვილი, სოციალურ ქსელში გამოქვეყნებული პოსტით ეხმიანება საპროტესტო მარშის დროს მომხდარ დაპირისპირებას, მიხეილ სააკაშვილის ბანერთან დაკავშირებით და ფაქტს მწვავე შეფასებებს აძლევს, კონკრეტულ პიროვნებებთან მიმართებაში კონკრეტული ფაქტების გახსენების პარალელურად.
,,სალომე ზურაბიშვილი პრობლემა არ არის. დაგვიძახებს – გავალთ! აი, ის სალომე ზურაბიშვილი, რომელიც ამბობდა – და თავის წიგნშიც წერდა – რომ 2008 წლის ომი საქართველომ დაიწყო – რომ 2007 წელს წითელუბნის რადარი სააკაშვილმა დაბომბა, რათა პუტინი ცუდ ტიპად წარმოეჩინა – რომელიც ივანიშვილის “პრინციპული არჩევანი” იყო 2018 წლის “საპრეზიდენტო არჩევნებად” წოდებული სპეცოპერაციისას (არაფრით რომ არ ჩამოუვარდებოდა 2024 წლის “არჩევნებს”) – რომელმაც დაიწყო “გარეჯი საქართველოას” რუსული სპეცოპერაცია და ეს ყველაფერი ერთხელაც არ მოუნანიებია…
არც სალომე ზურაბიშვილის მარჯვენა ხელი, ეკა ბესელიაა პრობლემა – აი, ის ეკა ბესელია, რომელმაც ბევრი იბრძოლა, რომ სააკაშვილის დროს დაჭერილი რუსი ჯაშუშები, ტერორისტები და რუსული ფსბ-ს ოფიცრები პოლიტპატიმრის სტატუსით გამოსულიყვნენ ციხეებიდან და რომელმაც ეს ყველაფერი სრულიად უანგაროდ გააკეთა (ჩემი გჯერა?!) – და არა დიდი ფულის სანაცვლოდ ან რუსული დავალების შესასრულებლად.
არც რომელიმე პათეტიკის მგმობი, პათეტიკური კულტურის მუშაკი, პოეტი, სახალხო არტისტი ან სხვა წითელი ინტელიგენტი გვიშლის ხელს, ბოლომდე რომ იჯდა ივანიშვილის კოლბაში და ხეირობდა რუსი ოლიგარქის პირობადებული სიკეთეებით, სანამ იქიდან პანჩურით არ გამოაგდეს და უთხრეს, მეტი აღარ დაგვჭირდებიო…
პრობლემა სააკაშვილის ბანერია! სააკაშვილის ბანერი უშლის ხელს ქოცებს ქოცების მოშორებაში. რა არის აქ გაუგებარი?!”, – წერს ზაზა ბიბილაშვილი.
ავტორი
ნინი ხიჯაკაძე
