“მეგობარი აქტის” (რომელსაც სენატში შეეცვალა სახელი და ახალი დაერქვა – “აქტი საქართველოში ჩინეთის კომუნისტური პარტიის, ირანის რეჟიმისა და რუსეთის ფედერაციის გავლენებთან შესაწინააღმდეგებლად”) მნიშვნელობასა და გავლენაზე საუბრობს სოციოლოგიის დოქტორი იაგო კაჭკაჭიშვილი:
“შეუძლებელია „MEGOBARI აქტის“ გადაჭარბებით შეფასება საქართველოში დემოკრატიის და დასავლური ორიენტაციის გადასარჩენად.
ხშირად ისმის კითხვა, რა მოაქვს ამ აქტს გარდა იმისა, რომ ქ/ოცნების მაღალჩინოსნების და მათთან დაახლოებული პირების კერძო ქონებას და პირად კომფორტს ადგება ზიანი?
ცალსახად შეიძლება ითქვას, რომ „MEGOBARI აქტი“ მოახდენს ქ/ოცნების ძალაუფლების მნიშვნელოვან დასუსტებას სხვადასხვა მიმართულებით:
1. საქართველოს ეკონომიკა დგას ინვესტიციებზე და დახმარებებზე, ხოლო ინვესტიციებისა და დახმარებების უდიდესი ნაწილი მოდის დასავლეთზე – ევროკავშირის ქვეყნებზე და აშშ-ზე. ინვესტიციები შეწყდება და ეს ეკონომიკურდ დაარტყამს საქართველოს მოსახლეობას. ცხადია, ამაზე პასუხისმგებელი ქ/ოცნება იქნება;
2. ქ/ოცნების ხელისუფლება კიდევ უფრო მეტად მოექცევა საერთაშორისო იზოლაციაში, მისი საგარეო ლეგიტიმაცია დემოკრატიული ქვეყნების მიერ შეუქცევადად დაზარალდება;
3. ქ/ოცნების რეაქცია, თვითგადარჩენის რეჟიმში, იქნება საქართველოს არსებითად გადასვლა რუსულ ორბიტაზე, რაც სარკისებურად და ნეგატიურად აისახება ხალხის განწყობებზე – ქ/ოცნებამ მოახერხა და შეაძულა დასავლეთი მოსახლეობის რაღაც ნაწილს, მაგრამ ვერაფრით შეაყვარა რუსეთი. ამდენად, „რუსული გეზი“ აუცილებლად იქნება წამგებიანი;
4. „MEGOBARI აქტის“ მიღება ახალ სიცოცხლეს შესძენს და განაახლებს საპროტესტო მოძრაობას, იქნება სტიმული პროტესტის გამოსახატავად;
5. ივანიშვილისგან და ქ/ოცნებისგან დისტანცირების მოტივაცია გაეზრდებათ ახლა კონფორმისტად ქცეულ ბიზნესმენებს – აღარ მოუნდებათ ჩაჰყვნენ ქ/ოცნების ჩარხის უკუღმა ტრიალს“, – წერს იაგო კაჭკაჭიშვილი ფეისბუქის პირად გვერდზე.
