გავრცელებული ინფორმაციით, ევროკავშირი წლის ბოლოსთვის გეგმავს მაქსიმალურად გააიოლოს უვიზო მიმოსვლის გაუქმება იმ 61 ქვეყნის, მათ შორის, საქართველოს მოქალაქეებისთვის, რომლებიც ამჟამად სარგებლობენ ამ პრივილეგიით. ევროკავშირში უვიზო მიმოსვლის შეჩერების საკითხთან დაკავშირებით სერიოზული მსჯელობები დაიწყო საქართველოს პოლიტიკურ წრეებშიც. პოზიციები დააფიქსირეს მმართველი პარტიის წარმომადგენლებმა:
,,დღეს, როგორც ჩანს, ბრიუსელის ბიუროკრატიის ნაწილს სურს, რომ ჰქონდეს ბერკეტები სხვა ქვეყნებზე გავლენის მოხდენის.
რაიმე ღვთიური მანანა არის უვიზო მიმოსვლა?! ჩვენც უვიზო გვაქვს გერმანელებისთვის და რა?! ეს ის ხომ არ არის, რაღაცა ქედმაღლური ყურება, პერიფერიისთვის, რომ ჩვენზე მოდის, მათი გადმოსახედიდან, გარკვეული მადლი, რომ გაძლევთ შესაძლებლობას შემოხვიდეთ.
ბოდიში მომითხოვია ყველასთან, მაგრამ ეს უვიზო მიმოსვლა გულისხმობს ქართველი ტურისტის წასვლას გერმანიაში, საფრანგეთში, იქ ფულის დახარჯვას და იქაურ ეკონომიკაში ფულის შეტანას. თუ ვიზები ჩაკეტეს, არავინ შეუშვეს ტურისტი, ფული არ ხარჯა იმ ქვეყანაში, ესეც არ ექნებათ. ამიტომ ვფიქრობ, რომ ქართველი ხალხი ამაზეც უნდა დავფიქრდეთ.
არის მცდელობა ადამიანების ემოციებზე ითამაშონ, რომ მერე ვიზა გექნება ასაღები და ვეღარ ჩახვალ ბერლინში თუ ფრანკპურტში. არვიცი, ეს 21-ე საუკუნის პოლიტიკას ეკადრება?!”, – განაცხადა პარლამენტის თავმჯდომარემ შალვა პაპუაშვილმა.
,,ევროპა საერთოდ გადახაზავს, უკვე ყველა პრინციპს გადაუვლის ფეხით და ეს საქართველოს არ ეხება მხოლოდ, 61 ქვეყანაა თუ მეტი, 70-მდე ქვეყანაა, ვისაც უვიზო მიმოსვლა აქვს ევროპასთან.
საქართველოს შემთხვევას ცალკე ნუ განვიხილავთ. არის ბალკანეთის ქვეყნები, სხვა ქვეყნები, რომელზეც ევროკავშირს სურს, იმედი აქვს და გეგმა აქვს ეგეთი, რომ დაამყაროს სრული კონტროლი. მარიონეტული რეჟიმი სჭირდება საქართველოში. აქედან გამომდინარე, ის სტანდარტი, რასაც ჰქვია ევროპული სტანდარტი, რომ იყო მთავარი, იყო სამართლიანი, რასაკვირველია, იქნება გადახაზული”, – განაცხადა პარლამენტის პირველმა ვიცე-სპიკერმა გიორგი ვოლსკიმ.
,,უვიზო მიმოსვლა ნამდვილად არის კომფორტი და ეს კომფორტი „ქართულმა ოცნებამ“ შეუქმნა ხალხს, როდესაც ჩვენივე შესრულებული ვალდებულებების ფონზე ევროკავშირმა მოგვცა უვიზო მიმოსვლა და ჩვენ ეს დავიმსახურეთ – არავის ტყუილად არ მოუცია.
თუმცა, როდესაც კომფორტი წინააღმდეგობაში და დაპირისპირებაში მოვა პატრიოტიზმთან, ეჭვიც არ მეპარება, რომ ქართველი ხალხი აირჩევს პატრიოტიზმს. იმიტომ, რომ ისტორიულადაც ქართველი ხალხი ყოველთვის რჩებოდა და მომავალშიც დარჩება ქვეყნის ერთგულ პატრიოტად“, – განაცხადა პარლამენტის ვიცე-სპიკერმა ნინო წილოსანმა.
,,ნამდვილად არ მაქვს ისეთი ცუდი წარმოდგენა ქართველ ხალხზე, რომ მისთვის ვიზალიბერალიზაცია უფრო მნიშვნელოვანი იყოს, ვიდრე იმ ანტიეროვნულ და ანტიქრისტიანულ პოლიტიკაზე უარის თქმა, რომლის ჩვენთვის თავსმოხვევასაც “დიფ სთეითი” ცდილობს“,- განაცხადა “ხალხის ძალის” ლიდერმა სოზარ სუბარმა.
ავტორი
მარიამ ხაჩირაშვილი
