ქალაქ რუსთავში კორონავირუსის ახალი შემთხვევა 70 წლის ქალბატონს დაუდასტურდა. დაინფიცირებული ეროვნული ბანკის თანამშრომელია, ხოლო მისი შვილი, რომელსაც აგრეთვე დაუდგინდა “კოვიდ 19”, საკრებულოს დეპუტატია.
როგორც ცნობილი გახდა, საკრებულოს წევრს აღენიშნებოდა “Covid 19”-სათვის დამახასიათებელი ნიშნები. ამ დროისათვის საკრებულოს დანარჩენი წევრები თვითიზოლაციაში იმყოფებიან. აღნიშნულ თემაზე კომენტარები გააკეთეს რუსთავის მერმა და დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორის მოადგილემ.
„ბოლო ერთი კვირის განმავლობაში პირადად მე მასთან კონტაქტი და შეხება არ მქონია. ჩვენ, კონსულტაციების საფუძველზე, გუშინ დაახლოებით 11:00-ის ნახევრიდან დავიწყეთ იმ ადამიანების იდენტიფიცირება, რომლებთანაც მას კონტაქტი ჰქონდა. ოთხშაბათი, ხუთშაბათი, პარასკევი – ამ თარიღებზეა საუბარი.
ინდენტიფიცირებული ადამიანები გაფრთხილებულები არიან და ამ დროისათვის თვითიზოლაციაში იმყოფებიან. ჩვენ ველოდებით იმ ანალიზის პასუხს, ამ პიროვნების ვისზეც ახლა ვსაუბრობთ. შიდა მონიტორინგი აკეთებს მოკვლევას. დაახლოებით 45 კონტაქტია დადგენილი. კონკრეტულად მასთან ერთად ვინც ახორციელებდა მოხალისეობრივ საქმიანობას ისინი გუშინვე გაფრთხილებულები იყვნენ და დილიდან თვითიზოლაციაში არიან. ეს არის დამატებითი პრევენცია.
დილიდან დაიწყო სადეზინფექციო სამუშაოები და დასრულებულია, მონიტორინგი ხდება, სათვალთვალო კამერებიდან იღებენ მონაცემებს. თუ ვისთან რამდენი წუთით ჰქონდა ამ პიროვნებას კონტაქტი. ეპიდემიოლოგები გადაწყვეტენ რა მიზნებით და რა საშუალებით მოხდება შემდგომი პროცედურებით ქალაქის გაკონტროლება,“ – განაცხადა რუსთავის მერმა ირაკლი ტაბაღუამ.
ამ ფაქტთან დაკავშირებით დღეს კომენტარი გააკეთა ასევე პაატა იმნაძემაც, მისი თქმით კორონავირუსით დაინფიცირებული რუსთავის მოქალაქის კონტაქტები დადგენილია და შესაბამისი ღონისძიებები მიმდინარეობს.
„რუსთავის წყარო დადგენილია და უკავშირდება ისევ და ისევ ბანკის საცავის თანამშრომლებს, ოღონდ ბანკის საცავის თანამშრომლები ყველა იმყოფებოდა იმ რეჟიმზე, რომელიც გვაქვს მიწოდებული დაწესებულებისათვის. ფაქტიურად ისინი იყვნენ ყაზარმულ რეჟიმზე გადაყვანილი. ეს არის ერთი კლასტერი და ამ კლასტერთან დაკავშირებული ყველა კონტაქტი დადგენილია, ყველა ღონისძიება ტარდება,’’ – განაცხადა პაატა იმნაძემ.
რუსთავში ახალი კორონავირუსის პირველი შემთხვევა 50 წლამდე ქალბატონს დაუდასტურდა, რომელიც გორის ჰოსპიტალშია გადაყვანილი და იქ გადის მკურნალობას.
ავტორი
თამთა ასლანიშვილი
