აჭარაში კიდევ ერთი კულინარიული წიგნის „კულინარიული მოგზაურობა ეთნოგრაფიულ საქართველოში“ გამოცემა იგეგმება. აჭარის ტურიზმის დეპარტამენტის ტურისტული პროდუქტების სააგენტო სახელმძღვანელოზე მუშაობას უკვე ასრულებს და მალე, დაინტერესებულ პირებს რიგით მესამე კულინარიულ გზამკვლევს შესთავაზებს. წიგნში საქართველოს სხვადასხვა რეგიონისთვის ეთნოგრაფიულად დამახასიათებელი 150-მდე კერძი და ტკბილეულია განთავსებული. სახელმძღვანელო, რომელზეც ეთნოგრაფებმა, მზარეულებმა და შეფ-დეკორატორებმა მუშაობა გასულ წელს დაიწყეს, წლის ბოლოსთვის დაიბეჭდება. მისი ელექტრონული ვერსიის ნახვა კი მსურველებს აპრილში, სააგენტოს ოფიციალურ გვერდზე https://visitajara.com/ka შეეძლებათ.
ახალ კულინარიულ გზამკვლევში ქართული კერძები რამდენიმე ქვეთავადაა დაყოფილი. ძირითად კერძებთან ერთად ცალკეა გამოყოფილი მხალეულისა და ლობიოს კერძები, რძე და რძის ნაწარმი, პურეული, სართავიანი ხაჭაპურები, ხუარბლის კერძები, ტკბილეული, შესანახი კერძები, მწნილი და საწებლები. გარდა უშუალოდ რეცეპტებისა, კერძებს წინ უძღვის პატარა შესავალი, სადაც თითოეული კერძის მომზადების ტრადიციაა მოთხრობილი. წიგნში კულინარიული ექსპედიცია აჭარიდან იწყება და საქართველოს ყველა რეგიონს მოივლის. მასში თითოეული ისტორიულ-ეთნოგრაფიული მხარისათვის დამახასიათებელი ის ყოველდღიური, სარიტუალო, თუ სტუმრისთვის განკუთვნილი კერძებია შესული, რომლებსაც ღირებული ადგილი ეჭირათ ამ კუთხეების კულინარიაში. შესაბამისად, წიგნში სხვადასხვა კუთხისთვის დამახასიათებელი კერძების მხოლოდ ნაწილია წარმოდგენილი.
„წიგნი-ალბომის ,,კულინარიული მოგზაურობა ეთნოგრაფიულ საქართველოში“ მიზანია შემოგატაროთ საქართველოს ისტორიულ-ეთნოგრაფიული მხარეების სამზარეულოები, მიგიყვანოთ თითოეული კუთხის საოჯახო კერასთან, ჩაგახედოთ ქართული სამზარეულოს ტრადიციებში, დაგაგემოვნებინოთ კერძები, რომლითაც ბარაქიანი ქართული ოჯახის დიასახლისი ხვდება სტუმრებს, გაგაცნოთ რეცეპტები, რომლითაც მრავალი თაობის განმავლობაში ამზადებდნენ ჩვენი ბებია-დედები, შეგაგრძნობინოთ ის სათუთი და, ზოგჯერ, საკრალური დამოკიდებულება, რაც ჩვენს წინაპრებს ჰქონდათ ტრადიციული ქართული კერძების მიმართ, გაგაცნოთ ის ნიუანსები, რაც განუმეორებელ და მრავალფეროვან სურნელსა და გემოს სძენს ქართულ კულინარიას,“ ნათქვამია წიგნის შესავალში.
აჭარის ტურისტული პროდუქტების განვითარების სააგენტომ გასულ წლებში ორი კულინარიული წიგნი “თევზეული ქართულ სამზარეულოში” და „კულინარიული მოგზაურობა აჭარაში“ დაბეჭდა. მესამე წიგნს კი დაინტერესებული პირები წლის ბოლოსთვის იხილავენ.
ინფორმაციას აჭარის ა.რ. ტურიზმისა და კურორტების დეპარტამენტი ავრცელებს
