16 მარტს თბილისში გაიმართა კონფერენცია – “საქართველო, უკრაინა და თანამედროვე მსოფლიო“, სადაც განხილული იყო საკითხი “საქართველოს მესამე პრეზიდენტის, მიხეილ სააკაშვილის პოლიტიკური პატიმრობა და სხვა პოლიტპატიმრები საქართველოში” და რომელსაც ესწრებოდნენ, პროდასავლური პარტიების ლიდერები, საქართველოს მე-3 პრეზიდენტის დედა, გიული ალასანია, საზოგადოებისათვის ცნობადი სახეები.
კონფერენციაზე, “მოძრაობა – სამოქალაქო საზოგადოება მიხეილ სააკაშვილის თავისუფლებისთვის” წარმომადგენელმა, მანანა ანდღულაძემ წაიკითხა მიხეილ სააკაშვილის მიერ კლინიკა “ვივამედიდან” გამოგზავნილი მისასალმებელი, სამადლობელო წერილი:
“მიმართვა ჩემს მეგობრებს!
ჩემო ძვირფასებო, დიდი მადლობა, რომ შეიკრიბეთ. თქვენ ხართ საზოგადოების საუკეთესო და ჯანსაღად მოაზროვნე ნაწილი.
ის, რაც ჩემს თავს ხდება, არის ერთ-ერთი ყველაზე დიდი უსამართლობა საქართველოს ისტორიაში, მაგრამ ეს არაფერია იმ საფრთხესთან შედარებით, რაც საქართველოს ემუქრება.
ჩვენი ქვეყნის დამოუკიდებლობა გაქრობის პირასაა, ამიტომ ჩვენ ყველამ ერთად უნდა ვთქვათ, რომ არასდროს დავნებდებით, არასდროს ჩამოვუშვებთ ხელებს, არ დავიღლებით და ჩვენ აუცილებლად გავიმარჯვებთ.
დიდება საქართველოს, დიდება უკრაინას, დიდება თავისუფლებას!” – მიმართავს მიხეილ სააკაშვილი.
