სოციოლოგიის დოქტორი იაგო კაჭკაჭიშვილი კონკრეტულ ფაქტებს იხსენებს და პარალელს ავლებს სანდრო გირგვლიანსა და მზია ამაღლობელთან დაკავშირებულ ფაქტებს შორის :
“ამას წინათ, ქ/ოცნების ერთ-ერთი იდეოლოგი წერდა, ყველაფერს ცდილობენ ოცნების მტრები, რომ რამე ისეთი ქეისი ჩაიჭირონ, რომელიც გირგვლიანის ტრაგედიის ტოლფასი იქნება, მაგრამ ასეთ რამეს ვერ ეღირსნენო, ვერ „გააგირგვლიანეს“ ოცნების დროს მომხდარი ამბებიო.
თუ დავაკვირდებით, ოცნების მიერ ადამიანების დაწიოკება სწორედ ასეთ მეთოდოლოგიაზე გადის: საზიზღრობები ჩაიდინონ მაშინ, როდესაც შავ საქმეებში – მინიმუმ მათი მომხრეებისთვის – დატოვებენ რაღაც პატარა კუნძულს ფეხის მოსაკიდებლად, კაუჭს, სინდისის მოსაჭიდებლად. ეს ყოველთვის არ გამოსდით, მაგრამ ცდილობენ ამ მეთოდოლოგიას არ გადაუხვიონ.
ამის ბოლო, ყველაზე ნათელი მაგალითი მზია ამაღლობელის შემთხვევაა. რასაც ამ ქალს ქ/ოცნება უკეთებს დღეს, არაფერში წერია არც სამართლებრივად და არც მორალურად, მაგრამ ბრუტალური სიჯიუტით სწირავენ ადამიანს, რადგან ეგულებათ „პოლიციელსხელიგაარტყა“ „არგუმენტი“, რომლითაც უნდათ თავიანთი შავი საქმე „გაათეთრონ“ და ამ „გათეთრებაში“ მათი ის მომხრეებიც აიყოლიონ, რომლებიც, ზოგადად, დაჩაგრულის მიმართ ემპათიურები არიან.
ამას, მარტივად, შემოვლითი გზით ბოროტების ჩადენა ჰქვია, რომელსაც შეიძლება ნაკლები ეფექტი აქვს, მაგრამ შინაარსით და სიმძიმით სხვა არაფერია, თუ არა მკვლელობა“, – წერს იაგო კაჭკაჭიშვილი ფეისბუქის პირად გვერდზე.
