“ემიგრანტობა ჩემთვის მხოლოდ განსაცდელი არ ყოფილა – ეს იყო ახალი შესაძლებლობების, თვითშემეცნების და ზრდის გზა” – თამარ შარაბიძე

სააგენტო “პარალელს” ისევ დაუკავშირდა საფრანგეთში მცხოვრები ემიგრანტი, თამარ შარაბიძე. მან საქართველო 2022 წელს დატოვა. ახალგაზრდა ემიგრანტი, საქართველოდან, სააგენტო “პარალელს” და საზოგადოებას უყვება თავის ისტორიას და გამოცდილების შესახებ ემიგრაციაში ყოფნის პერიოდში:

“ჩემთვის ემიგრაცია იოლი არჩევანი არ ყოფილა. საქართველოდან წამოსვლა მხოლოდ პირად განსაცდელთან არ იყო დაკავშირებული. დროთა განმავლობაში გავაცნობიერე, რომ ცხოვრების ახალი ფურცელი უნდა გადამეშალა, რაც არ იყო მარტივი, მაგრამ საჭირო იყო. ერთ-ერთი ყველაზე მნიშვნელოვანი აღმოჩენა, რაც ამ გზაზე გავაკეთე, არის ის, რომ რაც არ უნდა რთული იყოს მდგომარეობა, ადამიანს ყოველთვის აქვს ძალა, თავიდან დაიწყოს ყველაფერი და საკუთარი ხელით შექმნას მომავალი.

საქართველოში ძალიან აქტიური ცხოვრება მქონდა – ვსწავლობდი, ვცეკვავდი, სპორტით ვიყავი დაკავებული. ეს ყველაფერი ჩემი თვითმყოფადობის ნაწილი იყო. საფრანგეთში, თითქოს, ყველაფერი ნულიდან უნდა დამეწყო, რაც ბევრჯერ შემაშინებდა, მაგრამ დროთა განმავლობაში მივხვდი, რომ ეს დაბრკოლება კი არა, ახალი შესაძლებლობა იყო. ემიგრაციამ მასწავლა, რომ ადამიანი მაშინაც კი, როცა ყველაფერი ეცვლება, მაინც შეიძლება დარჩეს იმად, ვინც არის – თუ კი არ დაკარგავს საკუთარ ძალას და რწმენას.

პირველ რიგში, არასდროს უნდა დავკარგოთ საკუთარი თავი. მიუხედავად იმისა, რომ ახალ გარემოს უნდა შევეგუოთ, ჩვენი ფესვები არ უნდა დავივიწყოთ. მნიშვნელოვანია ენის სწავლა, პოზიტიური დამოკიდებულების შენარჩუნება და იმის მზადყოფნა, რომ გზა მარტივი არ იქნება. ხშირად შეიძლება თავი მარტოდ ვიგრძნოთ, მაგრამ ეს არ ნიშნავს, რომ უნდა დავნებდეთ.

ბევრჯერ მქონია მომენტი, როცა მივხვდი, რომ ამდენ სირთულესთან გამკლავება მარტივი არ იქნებოდა. ერთ დღეს, როცა ძალიან მარტო ვიგრძენი თავი, უბრალოდ გავედი ქალაქში და დავიწყე ფიქრი იმაზე, რამდენად შორს მოვედი. ვუყურებდი ქუჩებს, ხალხს, ვგრძნობდი, როგორ შევიცვალე და როგორ გავძლიერდი. იმ მომენტში გავაცნობიერე, რომ რაც არ უნდა რთული იყოს, ყოველთვის შეგვიძლია გავაგრძელოთ ბრძოლა და ვიპოვოთ ახალი გზები.

ასეთი მომენტები ბევრ ემიგრანტს აქვს. თავიდან თითქოს უცხო ხარ ამ გარემოში, მაგრამ დროთა განმავლობაში ამჩნევ, რომ ყველაფერი ეტაპობრივად დალაგდება. მთავარია, გვწამდეს საკუთარი ძალის და არ შეგვეშინდეს იმ ცვლილებების, რომლებიც გზად გვხვდება.

ხანდახან ცხოვრება გვაყენებს ისეთ გამოწვევების წინაშე, რომლებიც შეუძლებლად გვეჩვენება, მაგრამ უნდა გვახსოვდეს: ჩვენში ყოველთვის არის ძალა, რომელიც გვაძლევს საშუალებას, თავიდან ავაწყოთ ჩვენი ცხოვრება, აღმოვაჩინოთ ახალი შესაძლებლობები და გავხდეთ უფრო ძლიერები, ვიდრე ოდესმე წარმოგვედგინა“, – აღნიშნავს თამარ შარაბიძე.