ძალა ერთობაშია მხოლოდ, სხვა ყველაფერი გვერდზე უნდა გადავდოთ, თორემ არაფერი გვიშველის – თაკო ჩარკვიანი

ქვეყანაში შექმნილ სიტუაციას ეხმიანება პარტია “კანონი და სამართლის” თავმჯდომარე თაკო ჩარკვიანი და ხელისუფლებას მიმართავს კონკრეტული შეთავაზებებით. ოპოზიციონერ ლიდერს მიაჩნია, რომ ხელისუფლებამ უნდა გამოიყენოს ყველა რესურსი, მათ შორის, ოპოზიციაში მყოფი გამოცდილი კადრების მხრივ, რომ რაც შეიძლება მალე იქნას დაძლეული ქვეყანაში შექმნილი კრიზისული მდგომარეობა:

“ჩვენი პარტიის გადაწყვეტილებით დღეს ბრიფინგს ვატარებთ არა “კანონი და სამართლის” ოფისში, არამედ “ძალა ერთობაშიას” ოფისში, იმიტომ რომ, როგორც არასდროს, დღეს მართლაც ძალა ერთობაშია და ასე უნდა ვიყოთ, დღეს ეს აუცილებელია.

დავიწყებ იქედან, რომ დიდ მადლობას მოვახსენებ ექიმებს, რომლებიც ასე თავგანწირვით იბრძვიან და ქედს ვიხრი მათ წინაშე. ხელისუფლებასთან დაკავშირებითაც მინდა ვთქვა, რომ უძღვებიან საქმეს გარკვეულწილად, თუმცა არის პრობლემები და გუშინ გამოკვეთილად გამოჩნდა კრიზისის ნიშნები.

მივმართავ საქართველოს ხელისუფლებას და ამავდროულად გადავცემ მოქალაქეთა მოთხოვნას – როდესაც ქვეყანაში ასეთი მძიმე ვითარებაა, ალბათ უნდა გადავდოთ პოლიტიკური ოპონირება და ყველა ერთად დავდგეთ. მრავლად არიან ოპოზიციაში გამოცდილი ადამიანები და უნდა გამოვიყენოთ მათი შესაძლებლობები. მათ შორისაა გიორგი ვაშაძე, რომლის შესანიშნავ ინიციატივას კორონავირუსის სწრაფი ტესტირების თაობაზე მივესალმებით. ესაა მოსახლეობის თხოვნა და მოთხოვნა, ამიტომ ეს აუცილებლად უნდა გაკეთდეს.

ძალა ერთობაშია მხოლოდ, სხვა ყველაფერი გვერდზე უნდა გადავდოთ, თორემ არაფერი გვიშველის.

ჩვენი მხრიდან, პარტია “კანონი და სამართლის” მიერ მომზადდა 5-პუნქტიანი გეგმა და ირაკლი ღლონტის მიერ იყო წარდგენილი, სადაც გადასახადებთან დაკავშირებითაა საუბარი.

შექმენით ანტიკრიზისული საბჭო, წარმოადგინეთ კონკრეტული გეგმა და საქმის კურსში ჩააყენეთ მოსახლეობა, რომ იყოს მეტი სიმშვიდე. ქვეყანაში არსებულ პრობლემას ვერ მოერევა ერთი პოლიტიკური გუნდი. ანტიკრიზისულ საბჭოში უნდა შევიდნენ გამოცდილი ადამიანები ოპოზიციიდან. მაგალითად, პირდაპირ ვასახელებ გიორგი ვაშაძეს, რომელსაც კრიზისული სიტუაციის მართვის არაჩვეულებრივი გამოცდილება აქვს. ასევე ირაკლი ღლონტი, მასაც არაჩვეულებრივი გამოცდილება აქვს. გამოიყენეთ ეს ადამიანები, ქვეყნის გადასარჩენად.

ძალა ერთობაშია, კანონით და სამართლით!” – განაცხადა თაკო ჩარკვიანმა საგანგებოდ გამართულ ბრიფინგზე.