საქართველოს ეროვნული ნაკრების ფეხბურთელი, ხვიჩა კვარაცხელია საფეხბურთო კლუბ “ნაპოლის” ტოვებს და “პარი სენ ჟერმენში” PSG-ში გადადის. ამასთან დაკავშირებით ფეხბურთელმა გამოსათხოვარი ვიდეო ჩაწერა, სადაც ემოციურად საუბრობს კლუბში გატარებულ პერიოდსა და განცდებზე, ემოციურად ემშვიდობება “ნაპოლის” გულშემატკივრებს, მეუღლესა და პატარა დამიანესთან ერთად დასამშვიდობებლად მოინახულა კლუბის საფეხბურთო მოედანი და ფეხბურთელების გასახდელი:
“მოგესალმებით! მიჭირს და რთულია, თუმცა დამშვიდობების დრო მოვიდა. აქ საოცარი პერიოდი გავატარე, ერთად უამრავი მოგონება დავაგროვეთ, ბევრი საოცარი ემოცია განვიცადეთ.
ნაპოლი ჩემთვის სახლი იყო, სადაც თითოეული თქვენგანის დამსახურებით თავს საუკეთესოდ ვგრძნობდი. ის გზა, რაც ერთად გავიარეთ, ამ წამს თავში მიტრიალებს და ძალიან ემოციურია. პირველი გოლი და განცდები არასდროს დამავიწყდება. ჩემი პირველი ნაბიჯები ამ სტადიონზე, თქვენი გიჟური შეძახილები, ემოციები და მუხტი, რომელიც განსაკუთრებული იყო, როგორც საშინაო, ისე გასვლით შეხვედრებში. ნაპოლი საფეხბურთო ქალაქია, ნაპოლი ფეხბურთით ცხოვრობს და მიხარია, რომ ამ დიდი ისტორიის ნაწილი მეც გავხდი.
აქ ბევრი რამე ვისწავლე, როგორც მოედანზე, ისე მოედნის მიღმა, გავიზარდე როგორც ადამიანი და როგორც სპორტსმენი. ჩემთვის ძალიან საპატიო იყო ამ მაისურის ტარება. მინდა მადლობა გადავუხადო კლუბში მომუშავე თითოეულ ადამიანს: ჩემს თანაგუნდელებს, მწვრთნელებს, სტაფის ყველა წევრს და რაც მთავარია თქვენ, გულშემატკივრებს.
გემშვიდობებით, თუმცა ჩემს გულში მუდამ იქნებით და იმედია კიდევ შევხდებით. ვიცი ჩემი წასვლით გული ძალიან გწყდებათ, მაგრამ ერთ დღეს ყველაფერს მოგიყვებით. მინდა წარმატებები გისურვოთ ამ ქალაქს, ამ ხალხს ჩემპიონობა და სკუდეტო მოვუტანოთ.
ამ სტადიონზე, როგორც ნაპოლის ფეხბურთელმა, ბოლოჯერ შემოვაბიჯე. წასვლამეე ამიც გაკეთება ძალიან მინდოდა…
აქ მოვედი, როგორც პატარა ბიჭი, რომელსაც ბევრი არ იცნობდა, ახლა კი აქაურობას ვტოვებ როგორც კაცი, რომელსაც თან მიაქვს უამრავი ადამიანის სიყვარული, ბევრი გამარჯვება და, რაც ყველაზე მთავარია, ის ნანატრი “სკუდეტო” და ჩემპიონობა, რომლის სურვილითაც ეს ქალაქი ბევრი წლის განმავლობაში ცხოვრობდა.
დღეს აქ ჩემი ცხოვრების ორ მთავარ ადამიანთან ერთად მოვედი: ნიცა, რომელიც მუდამ ჩემს გვერდითაა და ყველა მნიშვნელოვან მომენტს ჩემთან ერთად იზიარებდა და ჩვენი დამიანე, რომელიც დღეს სტადიონზე პირველადაა.
როცა წლები გავა და გაიზრდება, მინდა, ეს ვიდეო ნახოს და ამით იამაყოს“, – აღნიშნავს ხვიჩა კვარაცხელია.
