,,ერთიანობა – ნაციონალური მოძრაობის” პრესსპიკერი, ლევან სანიკიძე განმარტებებს აკეთებს იმ მოსამართლეების აღრიცხვასთან დაკავშირებით, რომლებიც აქციაზე დაკავებულებს ადმინისტრაციული და სისხლის სამართლის დანაშაულით პატიმრობას უსჯიან და აღნიშნავს, რომ ქვეყანაში რეპრესიები მიმდინარეობს:
,,მიდის აქტიური მუშაობა და ვაკეთებთ აღრიცხვას ყველა იმ მოსამართლის, რომელიც სხვადასხვა ქალაქში ეწეოდა ეგზეკუციას და ივანიშვილის დავალებით, როგორც ადმინისტრაციული ისე სისხლის სამართლის წესით ამწესებს უამრავ ჩვენს პატრიოტ თანამოქალაქეს აბსოლუტურად უდანაშაულოდ.
ყველას კარგად უნდა ესმოდეს, რომ იმ სანქცირებული მოსამართლეების გარდა, როგორიც არის ბატონი მურუსიძე და დანარჩენი სამი მოსამართლე, ყველა ის მოსამართლე, რომელიც დღეს იღებს ამ სახელმწიფოს ძირის გამოთხრაში აქტიურ მონაწილეობას, ყველა მათგანთან აუცილებლად მივა სანქციების საკითხი და დასავლელ პარტნიორებთან ამაზე ძალიან აქტიური და ყოველდღიური მუშაობა მიმდინარეობს.
რა თქმა უნდა, სია იქნება სრულყოფილი ჩვენ კარგად უნდა გვესმოდეს, რომ იმდენად მსხვილი მასშტაბი მიიღო პოლიტიკურმა რეპრესიებმა, რომ ამას ლოჯისტიკურად სჭირდება მოგვარება, იმ თვალსაზრისით, რომ ყოველდღიურად მიმდინარეობს ეს პროცესები. ინფორმაციის მიმოცვლა როგორც რეპრესირებულის ოჯახის წევრებთან, ისე ადვოკატებთან არის ძალიან მნიშვნელოვანი.
აქედან გამომდინარე ყველა ეს ნაბიჯი ჩვენი მხრიდან იქნება გადადგმული და სწორედ ეს იქნება რამდენიმე დღის განმავლობაში ყველაზე პრიორიტეტული საკითხი ჩვენთვის“, – განაცხადა ლევან სანიკიძემ.
ავტორი
მარიამ ხაჩირაშვილი
