„ახალი საქართველოს“ თავმჯდომარემ გიორგი ვაშაძემ საგანგებო ბრიფინგი გამართა. გაერთიანებული ოპოზიციის ერთ-ერთმა ლიდერმა ჯანდაცვის სამინისტროს და პრემიერ-მინისტრ გიორგი გახარიას მოუწოდა, რომ ჩინეთიდან კორონავირუსის დამდგენი სწრაფი ტესტების შემოიტანონ და ბიუროკრატიული რეგულაციები მოიხსნას. მისი თქმით, თუ ხელისუფლებას არ შეუძლია ამ ტესტების ჩამოტანა, მზად არის ეს საკუთარ თავზე აიღოს და თვითონ ჩამოიტანოს ტესტები საქართველოში.
„ხალხო ეპიდემიის ზღვარზე ვართ! ყველას უნდა, რომ ტესტი გაიკეთოს იმისთვის, რომ დარწუნდეს, მას არ აქვს ეს დაავადება და ამ დროს ხელისუფლება ბიუროკრატიაშია ჩაფლული.
ხელში მაქვს დოკუმენტები, რომ არ ისპეკულიროთ შემდგომში ფასებთან დაკავშირებით. არ გამიკვირდება, რომ ვინეს ხელის მოთბობა უნდოდეს ხალხის გაჭირვებაზე. მაქსიმუმ 5 დოლარია სწრაფი ტესტის ფასი და 10 დოლარი „პისიარ“ ტესტის ფასი.
ამერიკის წამლის სააგენტო გამოვიდა და თქვა, რომ ხსნის ყოველგვარ ბიუროკრატას. ყველაზე ბიუროკრატიული სააგენტო ყოველგვარ შეზღუდვას ხსნის მთელი ქვეყნის მასშტაბით, შეუძლიათ სადაც უნდა გამოიყენონ კერძო თუ საჯარო ლაბორატორიებმა ის სწრაფი თუ სხვადასხვა ტიპის ტესტები, რომლითაც კორონავირუსის დეტექცია მოხდება.
ჩვენთან რა ხდება? ჩვენთან ბიუროკრატიას ქმნის ჯანდაცვის სამინისტრო. ექიმები დღედაღამე მუშაობენ იმისათვის, რომ უმკურნალონ ინფიცირებულ პაციენტებს, ჯანდაცვის სამინისტრო კი რაღაც ბიუროკრატიებს ქმნის. აგრესიული ტესტირებაო რომ იძახით, 1000 ნაჩუქარი ტესტი ვერ ჩამოგიტანიათ ჩინეთიდან.
გამოსავალი არის ძალიან მარტივი ყველა კერძო ლაბორატორია უნდა ჩართოთ ამ პროგრამაში მყისიერად უნდა მოიხსნას ხელის შეშლა ყოველგვარი და რეგულაცია უნდა მოიხსნას ტესტების შემოტანასთან დაკავშირებით,” – აცხადებს გიორგი ვაშაძე.
ავტორი
თამთა ასლანიშვილი