,,სტრატეგია აღმაშენებლის” ახალგაზრდული ორგანიზაციის ლიდერი, პაატა კვირკვაია სააგენტო ,,პარალელთან” ინტერვიუს აკეთებს, სადაც საუბრობს ევროპარლამენტში პრეზიდენტ სალომე ზურაბიშვილის სიტყვით გამოსვლის მნიშვნელობასთან დაკავშირებით:
,,სალომე ზურაბიშვილის გამოსვლა ევროპარლამენტში ემოციური და სტრატეგიული მნიშვნელობით დატვირთული იყო, რაც სხვადასხვა ემოციებს და მიზნებს აღძრავს როგორც ქართველ, ისე საერთაშორისო აუდიტორიაში.
ბევრი ქართველი მისი გამოსვლის შედეგად ამაყობს იმით, რომ ქვეყნის პრეზიდენტი საერთაშორისო ასპარეზზე ისეთ მნიშვნელოვან ფორუმზე საუბრობს, როგორიც ევროპარლამენტია.
პრეზიდენტის მკაფიო მესიჯები დემოკრატიის, ადამიანის უფლებებისა და ევროპული ღირებულებების მნიშვნელობის შესახებ შთაგონებას აძლევს მათ, ვინც მხარს უჭერს რეფორმებს და ევროპულ მომავლისკენ სწრაფვას.
გამოსვლის ერთ-ერთი მთავარი მიზანი იყო საქართველოსადმი ევროპარლამენტის და ევროკავშირის მხარდაჭერის გაძლიერება, არა მმართველი პარტიის, არამედ ქართველი ხალხის მიმართ. ეს არის სიგნალი როგორც ადგილობრივი ხელისუფლებისთვის, ისე საზოგადოებისთვის, რომ ევროკავშირში ინტეგრაცია პრიორიტეტულია.
გამოსვლა, მისი შინაარსისა და ტონის მიხედვით, მიზნად ისახავდა ქართველი ხალხისთვის იმედის და ერთიანობის განცდის გაღვივებას, განსაკუთრებით ევროპული მომავლის პერსპექტივაში. სალომე ზურაბიშვილის გამოსვლა ევროპარლამენტში აღძრავს როგორც იმედს, ისე პასუხისმგებლობის განცდას, რომ ის დგას ხალხის გვერდით და ყველაფერს გააკეთებს იმისთვის, რომ ჩვენთან ერთად დაამარცხოს რუსული რეჟიმი და ერთხელ და სამუდამოდ გაათავისუფლოს საქართველო რუსული წნეხებისაგან.
ბოლოს კი შემიძლია ვთქვა, რომ სალომე ზურაბიშვილი არის და იქნება საქართველოს პრეზიდენტი, იქამდე სანამ არ დაინიშნება და არ ჩატარდება ახალი არჩევნები!”, – განაცხადა პაატა კვირკვაიამ.
ავტორი
ნინი ხიჯაკაძე
