დღეს, პრემიერ-მინისტრ გიორგი გახარიას ხელმძღვანელობით, მთავრობის ადმინისტრაციაში უწყებათაშორისი საკოორდინაციო საბჭოს მორიგ სხდომა გაიმართა. სხდომაზე, საქართველოში კორონავირუსის გავრცელების საპრევენციო ღონისძიებების ფარგლებში, ახალი გადაწყვეტილებები მიიღეს:
1. 18 მარტიდან, ორი კვირით იკრძალება საქართველოს სახელმწიფო საზღვარზე შემოსვლა უცხო ქვეყნის მოქალაქეებისთვის;
2. დროებით იკეტება საქართველოს სამთო-სათხილამურო კურორტები;
3. კაფეებს, რესტორნებსა და ბარებს ეძლევათ რეკომენდაცია, დროებით შეიზღუდოს მოქალაქეების უშუალო მომსახურება და იმოქმედოს მხოლოდ ე.წ გატანის სერვისებმა;
4. მთავრობის ადმინისტრაციაში იქმნება უწყებათაშორისი საკოორდინაციო საბჭოს სხდომაზე მიღებული გადაწყვეტილებების შესრულების მონიტორინგის მექანიზმი;
5. 70 წელს გადაცილებულ მოქალაქეებს ეძლევათ რეკომენდაცია, მაქსიმალურად მოერიდონ საზოგადოებრივი თავშეყრის ადგილებს და შეძლებისდაგვარად იმყოფებოდნენ იზოლაციაში, რათა თავიდან იყოს აცილებული პოტენციური საფრთხე მათი ჯანმრთელობისთვის.
სხდომაზე კონკრეტულ საკითხებზე გაამახვილა ყურადღება პრემიერ-მინისტრმა.
„ერთმნიშვნელოვნად ჩვენ უნდა მივიღოთ გადაწყვეტილება კაფე, რესტორანი და ბარების დახურვასთან დაკავშირებით, იმიტომ რომ სხვანაირად გაგვიჭირდება მართვა.
რამდენიმე კრიტიკულად მნიშვნელოვანი განზომილებაა, რომლის ეფექტური მართვაც საბოლოო ჯამში იმოქმედებს იმაზე, საბოლოო ჯამში ჩვენ გავუმკვლავდებით თუ არა გამოწვევებს. ესენია – ჯანდაცვა, ეკონომიკა, ლოგისტიკა და მარაგების მართვა და საზოგადოებრივი წესრიგი“, – განაცხადა გიორგი გახარიამ.
აქვე აღინიშნა, რომ თითოეულ მიმართულებაზე პასუხისმგებელი იქნება შესაბამისი პროფილის მინისტრი.
ავტორი
თამთა ასლანიშვილი
