საერთაშორისო სწავლების კვლევითი ცენტრის დირექტორი, ექსპერტი საერთაშორისო და უსაფრთხოების საკითხებში, პოლიტოლოგი ნიკა ჩიტაძე სააგენტო ,,პარალელთან“ ინტერვიუში ყურადღებას ამახვილებს სტუდენტებისა და ლექტორების ჩართულობაზე ქართულ პოლიტიკურ პროცესებში:
,,ჩემი აზრით, აღნიშნულ ღონისძიებებს შეუძლია მნიშვნელოვანი როლი შეასრულოს, ვგულისხმობ სტუდენტების და ლექტორების ერთობლივ ქმედებებს საქართველოში დემოკრატიის, ევროპული ღირებულებებისა და საქართველოს ევროპული ინტეგრაციის დასაცავად.
მეც პირადად ,,დაიტოვეს“ ჩათში გავწევრიანდი და ბუნებრივია, მექნება მუდმივი კონტაქტი როგორც ახალგაზრდა თაობის წარმომადგენლებთან, ასევე ჩემს კოლეგებთან, პროფესორ-მასწავლებლებთან სხვადასხვა უმაღლესი საგანმანათლებლო დაწესებულებიდან.
კვირას 17:00 საათზე ილიას უნივერსიტეტიდან იწყება აქცია. მნიშვნელოვანია მსგავს ღონისძიებებში მონაწილეობის მიღება. იქნება ეს ქუჩის აქციები, აუდიტორიებში თუ მის ფარგლებს გარეთ. ვიცით, რომ ღია ლექციებიც იქნა წაკითხული ილიას უნივერსიტეტის წინ.
მე მგონია, რომ როდესაც ერის ინტელექტუალური ნაწილი, პირველ რიგში, ვგულისხმობ ახალგაზრდებს, ერთვება პროცესში, ეს არის მნიშვნელოვანი. ამავე დროს, ერთობლივი ქმედება – მოსახლეობის დარწმუნება იმაში, თუ რა საფრთხე მოაქვს იგივე ,,ქართული ოცნების“ საქმიანობას, აქედან გამომდინარე, რა საფრთხე მოდის რუსეთიდან, რომ ეს ყველაფერი დაკავშირებულია ოჯახურ, რელიგიურ ღირებულებებთან – ეს ყველაფერი არის დეზინფორმაცია, რომელსაც რუსეთი ,,ქართული ოცნების“ მეშვეობით საქართველოში ავრცელებს.
მოსახლეობა უნდა დადგეს, პირველ რიგში, ქართული ძალების მხარეზე. მათ შორის, ვგულისხმობ ქვეყნის ინტელექტუალურ ნაწილს.
ჩვენ ვიცით, რა მნიშვნელოვანი როლი შეასრულეს ახალგაზრდებმა გაზაფხულზე. მართალია რუსული კანონი მაინც მიიღეს, მაგრამ ახალგაზრდებმა საკუთარი ძალა აჩვენეს და დღესაც მზადყოფნას გამოხატავენ საკუთარი ძალა ისევ აჩვენონ“, – განაცხადა ნიკა ჩიტაძემ.
ავტორი
ნინი ხიჯაკაძე
