,,ერთიანობა – ნაციონალური მოძრაობის” ერთ-ერთი ლიდერი, გიორგი ვაშაძე საგანგებო ბრიფინგზე განცხადებას აკეთებს 26 ოქტომბრის საპარლამენტო არჩევნების შედეგებთან დაკავშირებით და “ტვ პირველის” ეთერში “მელაძის შაბათში” ნაჩვენები არჩევნების გაყალბების ფაქტების შეფასებას ახდენს:
,,ჩვენ ვნახეთ ფარულობის დარღვევას ტოტალური კონტროლისთვის როგორ იყენებდა ,,ქართული ოცნება” და ამისი კონკრეტული მტკიცებულებები; ჩვენ ვნახეთ, როგორ ატრიალებდა კარუსელს ,,ქართული ოცნება” და ამისი კონკრეტული მტკიცებულებები; ჩვენ ვნახეთ სხვისი დოკუმენტებით ხმის მიცემის კონკრეტული მტკიცებულებები; ჩვენ ვნახეთ პირადი ნომრებით უცხოეთში მყოფი ადამიანების ნაცვლად ხმის მიცემის კონკრეტული მტკიცებულებები; ჩვენ ვნახეთ ორგანიზებულ-დანაშაულებრივი სქემა, რომელშიც ჩართულები არიან ე.წ. რეგისტრატორები, კომისიის წევრების სახით. ის ვითომდა პროფესიული ნიშნით დანიშნული სუს-ის მიერ შერჩეული ადამიანები, რომლებიც ამ სქემის საკვანძო ფიგურები არიან; ჩვენ ვნახეთ, როგორ ჰქონდათ უკანონოდ აწყობილი ქოლ-ცენტრები და როგორ ძალადობდნენ პირდაპირ ადამიანებზე ამ ქოლ-ცენტრებიდან; ვნახეთ კონკრეტული ადამიანების სახელები და გვარები, რომლებიც ვერც კი უარყოფენ, რომ ჩართულები იყვნენ ამ ორგანიზებულ-დანაშაულებრივ სქემაში.
მეგობრებო, სრულად გაშიფრულია ის დანაშაულებრივი სისტემა, რომელიც შექმნა ,,ქართულმა ოცნებამ”. სწორედ ამიტომ ვამბობთ, რომ ეს არ იყო არჩევნები. ეს იყო სპეც. ოპერაცია საქართველოს ეროვნული ინტერესების წინააღმდეგ.
სწორედ ამიტომ ვითხოვთ ჩვენ საერთაშორისო გამოძიებას, რომელსაც ეწინააღმდეგება ,,ქართული ოცნება”. იმიტომ, რომ მათ კარგად იციან, ეს არის ტოტალური კონტროლის ქვეშ ჩატარებული არჩევნები, ორგანიზებულ-დანაშაულებრივი სქემა, რომლის პრეცენდენტი, ხაზს ვუსვამ, ასეთი ტიპის ორგანიზებულ-სისტემური დანაშაულების პრეცენდენტი მსოფლიოში არ არსებობს.
სწორედ ამიტომ, ჩვენ – ოპოზიცია ვითხოვთ არჩევნების ახლიდან ჩატარებას. ოღონდ არჩევნების ახლიდან ჩატარებას არა იმ წესებით, რომელმაც ეს ორგანიზებულ-დანაშაულებრივი სისტემა ჩამოაყალიბა, არამედ ახალი წესებით, რომელიც იქნება გარანტი თითოეული ადამიანის ხმის დაცვის”, – განაცხადა გიორგი ვაშაძემ.
ავტორი
ნინი ხიჯაკაძე
