“ერთიანობა ნაციონალური მოძრაობის” ერთ-ერთი ლიდერმა, გიორგი ვაშაძემ, ტელეკომპანია “მთავარზე”, თოქ-შოუ “ღამის მთავარზე”, საპროტესტო მოძრაობის გეგმების შესახებ ისაუბრა და საზოგადოებას მხარდაჭერისა და ჩართულობისკენ მოუწოდა:
“რა არის ჩვენი სამოქმედო გეგმის ნაბიჯები?
პირველი – ბრძოლა ბოლომდე. ამ ბრძოლაში ჩვენ აუცილებლად გავიმარჯვებთ. 2 მთავარი მიმართულება – ეს არის არჩევნების არაღიარება ქვეყნის შიგნით და ქვეყნის გარეთ;
მეორე – მწვავე პროტესტი.
ეს არის ის რეალური, რაც ჩვენ უნდა გავაკეთოთ.
ორშაბათ 7 საათზე არის პირველი დიდი შეკრება. მანამდე ჩვენ ყველა საერთაშორისო ორგანიზაციას წარვუდგენთ ყველა მტკიცებულებას გაყალბების იმ სისტემური სპეცოპერაციისას, რომელიც ჩაატარა “ქართულმა ოცნებამ” და რისი არაერთი მტკიცებულება არის და პარალელურად უკვე ვამზადებთ ძალიან სერიოზულ განგრძობად წინააღმდეგობას. ეს არის მნიშვნელოვანი.
ანუ, 2 კომპონენტია – ეს არის ქუჩის კომპონენტი, გადამწყვეტი, როგორც მნიშვნელოვანი ფაქტორი და ასევე არის საერთაშორისო კომპონენტი. სხვა მექანიზმი, რომ “ქართული ოცნება” ვაიძულოთ გაუქმდეს გაყალბებული არჩევნები პრინციპში არ არსებობს, ბუნებაში.
მე ერთ რამეს ვპირდები ყველას, რომ მზად ვარ ბოლომდე ბრძოლისთვის, თავგანწირვისთვის… თავს დავდებ, ხალხნო…
ხმა ხომ გვანდეთ, ახლა გვენდეთ და გამოგვყევით ამ პროცესში.
მე, პირადად, მზად ვარ ყველაფრისთვის – დავიცვა ჩემი სამშობლო, დავიცვა ჩემი ქვეყნის მომავალი, ჩემი და თქვენი შვილების მომავალი” – განაცხადა გიორგი ვაშაძემ.
