,,ერთიანობა – ნაციონალური მოძრაობის” ერთ-ერთი ლიდერი, იგორ ნარმანია სოციალურ ქსელში პოსტს აქვეყნებს, სადაც კონკრეტულ ფაქტებს იხსენებს, მის ოჯახთან დაკავშირებით და საზოგადოებას საპროტესტო აქტივობებისკენ მოუწოდებს:
,,დილიდან ვფიქრობ რომ ამ ქვეყანაში არაფერი ღირს, სადაც არჩევნებს აზრი არ აქვს, სადაც ტოტალური გაყალბების გარდა, სამწუხაროდ უამრავი ადამიანი გაიყიდა და გაყიდა სამშობლოს, შვილის, მეგობრის, ნათესავის მომავალი.
ყელში ბურთი მახრჩობს ბრაზისგან.
ათასი ფიქრი ირევა დილიდან, რომ უნდა წავიდეთ, აზრი არ აქვს, მორჩა..
მაგრამ, არსებობს ერთი დიდი მაგრამ…
ბაბუაჩემს იარაღით და ტანკით დასდევდნენ ამ ქვეყანაში მისივე თანამოქალაქეები და ვინ იცის რას ფიქრობდა და როგორ წყდებოდა გული, სიმართლის გამო რომ მოსდევდნენ, მაგრამ არც ერთი წუთით არ დანებებულა ამ ქვეყნისთვის ბრძოლას.
მამაჩემი ხან მძევლად დაიტოვეს, მასაც მოსდევდნენ იარაღით – არ დანებებულა.
ჩემს სახლს 48 ნატყვიარები აქვს რუსის მართული ჩემივე თანამოქალაქეების მხრიდან, რომ ჩემი ოჯახის წევრები ჩაეცხრილა მხედრიონს. გააქციეს ქვეყნიდან, მაგრამ არ დანებებულან, დაბრუნდნენ და ისევ ვიბრძვით.
მესმის გულგატეხა , მესმის გულისწყრომა, ბრაზი, იმედგაცრუება, აბსოლუტურად ყველაფერი მესმის.
მაგრამ ეს ქვეყანა ჩვენია და არავისთვის არ გვაქვს დასათმობი.
მე ვაპირებ გავაგრძელო ბრძოლა, სიცოცხლის ფასად, ბრძოლა რუსეთისგან თავისუფალი საქართველოსთვის.
ეს ჩემი ვალია, ჩემი ვალდებულებაა.
თავები მაღლა, ბრძოლა გრძელდება !
მჯერა, რომ ამ ქვეყნის საუკეთესო დღეები არის წინ! 🇬🇪🇪🇺”, – განაცხადა იგორ ნარმანიამ.
ავტორი
მარიამ ხაჩირაშვილი
