სტრატეგიისა და საერთაშორისო ურთიერთობების კვლევის ფონდის (რონდელის ფონდის) მკვლევარი, აღმოსავლეთმცოდნე, ისტორიის მეცნიერებათა დოქტორი ზურაბ ბატიაშვილი ისტორიულ ფაქტებს იხსენებს და მონობის დასასრულის აუცილებლობაზე საუბრობს:
“ისტორიულად სულ ასე იყო – ქართველების ნაწილს მიაჩნდა, რომ დამოუკიდებლად უნდა გვეარსება, მეორე ნაწილი კი სხვა ერთა მორჩილებაში (მონობაში) ყოფნის მომხრე იყო. ამ მეორე ნაწილს თავისუფლად არსებობა ვერ წარმოედგინა.
აღმაშენებელმა დიდგორის ბრძოლაში სწორედ მონობის მომხრე ნაწილისთვის ჩახერგა უკან დასახევი გზა, თორემ პირველ ნაწილს შეგნებული ჰქონდა რისთვისაც იბრძოდა და მას გზის ჩახერგვა არ სჭირდებოდა.
საუკუნეების განმავლობაში პირველი ნაწილი ყოველთვის მიათრევდა მეორე ნაწილს და გაყავდა ქვეყანა სწორ გზაზე.
თუმცა იყო ფრაგმენტები, როდესაც სხვადასხვა ხერხებით (ძალადობა, მოტყუება, ოკუპაცია და ა.შ.) ეს მეორე ნაწილიც იმარჯვებდა (მაგალითად 1921 წელს), მაგრამ ამას უფრო დროებითი ხასიათი (ისტორიისთვის 70 წლიანი საბჭოთა ოკუპაციაც დროებითი მოვლენაა) ჰქონდა ხოლმე.
ამ გრძელი ისტორიის მანძილზე მონობის მომხრეებს გრძელვადიანად რომ გაემარჯვათ, დღეს საქართველო არ იარსებებდა.
საგულისხმო იყო ეროვნული მოძრაობის აღმავლობის პერიოდში 1990 წლის 28 ოქტომბერს ჩატარებული არჩევნები, როდესაც კომუნისტებმა ხმების თითქმის 30% მიიღეს. მაგრამ მალევე იმდენად სამარცხვინო გახდა კომუნისტობა და საბჭოეთის მონობის ქვეშ ცხოვრება, რომ 5 თვეში (1991 წლის 31 მარტს) გამართულ რეფერენდუმზე იგივე ადამიანებმა ერთხმად ხმამისცეს საქართველოს დამოუკიდებლობას (რეფერენდუმზე დამოუკიდებლობის იდეას მხარი დაუჭირა საქართველოს მოქალაქეების 99%-მა).
ასე მოხდება ახლაც. ამ ქვეყანაში მონობის მომხრეები არ არიან უმრავლესობაში და მათი გათავისუფლებაც ჩვენ მოგვიწევს ამ არჩევნებზე.
ხო, ამ არჩევნებში ეს პარადიგმაც (თავისუფლება vs მონობა) საბოლოოდ უნდა დავამსხვრიოთ. ამისთვის კი საჭიროა, რომ მონობის ფენომენი (რუსეთისადმი გაწოლის სურვილი) დავამარცხოთ საქართველოში და ესეც ამ არჩევნებზე უნდა მოხდეს!
სიმბოლურია, რომ ახლა 1924 წლის საქართველოს თავისუფლებისთვის აჯანყების 100 წლისთავიცაა და უნიკალური შანსი გვაქვს, რევანში ავიღოთ რუსეთის იმპერიაზე!
ყველაფერი კარგად იქნება!
ვიბრძოლოთ და გავიმარჯვებთ სახელოვნად!” – წერს ფეისბუქის პირად გვერდზე ზურაბ ბატიაშვილი.
