საქართველოს პარლამენტის თავმჯდომარემ ბრიფინგზე ოპოზიციურ პარტიებთან შეთანხმების შესახებ განაცხადა, რომელიც პროპორციული სისტემას ეხება. არჩილ თალაკვაძის აზრით, ეს იყო საზოგადოების დაკვეთა და მოქმედმა ხელისუფლებამ დაამტკიცა, რომ მათთვის მნიშვნელოვანია ქვეყნის დემოკრატიული და მშვიდობიანი განვითარება:
„გამართული პოლიტიკური მოლაპარაკებები და დიალოგი ოპოზიციასა და მმართველ პარტიას შორის დადებითი შედეგით და შეთანხმებით დასრულდა. ყველა ძირითად საკითხთან დაკავშირებით, რომელიც განიხილებოდა, პოლიტიკური შეთანხმება მიღწეულია. ამით ჩვენ, როგორც მმართველმა ძალამ „ქართულმა ოცნებამ“ და ხელისუფლებამ დაამტკიცა, რომ ჩვენი მნიშვნელოვანი ღირებულება და პრიორიტეტი არის ჩვენი ქვეყნის მშვიდობიანი განვითარების უზრუნველყოფა დემოკრატიული პრინციპები და უსაფრთხოება.
ჩვენ მიგვაჩნია, რომ ეს შეთანხმება არის მიღწევა და არის პროგრესული გადაწყვეტილება ყველა მხარისათვის და ეს იყო ჩვენი საზოგადოების დაკვეთა ეს იყო გადაწყევტილება, რომელმაც რეალურად აჩვენა, რომ საქართველოს პოლიტიკური სისტემა მზად არის დემოკრატიის შემდგომი განვითარებისათვის.
ჩვენ ვაგრძელებთ დემოკრატიის განვითარებას ჩვენ ქვეყანაში და ვემზადებით 2020 წლის საპარლამენტო არჩევნებისათვის, რომელიც ჩატარდება დემოკრატიულად როგორც ჩვენ ხელისუფლებას და საქართველოს გვაქვს დემოკრატიული საპარლამენტო არჩვენების ისტორია, რომელსაც ძალიან ვუფრთხილდებით.
2012 წლიდან საქართველოში არჩევნები ტარდება დემოკრატიულად და რა თქმა უნდა ჩვენი მიზანი არის, რომ 2020 წლის არჩევნებიც ჩატარდეს მაღალი სტანდარტით, თავისუფლად, გამჭვირვალედ და დემოკრატიულად.
შეთანხმება შედგა შემდეგ საკითხებზე: 2020 წლის საპარლამენტო არჩევნები ჩატარდება პროპორციულ და მაჟორიტარულ მანდატებს შორის 120/30–ზე განაწილებით. გახსოვთ ალბათ ოპოზიცია ითხოვდა მაჟორიტარული მანდატების 20–მდე შემცირებას ჩვენ ამას არ დავეთანხმეთ და საბოლოოდ შევთანხმდით 120/30–ზე განაწილებაზე. ჩატარდება 1%–იანი ბარიერით. იქნება დაცული პრინციპი, რომ პოლიტიკური პარტია, რომელიც 40%–ზე ნაკლებ მხარდაჭერას მიიღებს არჩევნებში ვერ დააკომპლექტებს უმრავლესობას და მთავრობას.
ასევე შევთანხმდით მნიშვნელოვან პრინციპზე, 2020 წლიდან 2024 წლის ჩათვლით, თუ საჭირო გახდა რიგგარეშე არჩევნების ჩატარება, ის ჩატარდება 2020 წელზე შეთანხმებული პრინციპით. ეს გამორიცხავს და პრაქტიკულად აღარ უტოვებს შანსებს დესტრუქციულ პოლიტიკურ ჯგუფებს, რაიმენაირად კიდევ გააგრძელონ მცდელობა, რომ 2020 წლის არჩევნების ლეგიტიმაცია დადგეს კითხვის ნიშნის ქვეშ,“ – განაცხადა პარლამენტის თავმჯდომარემ.
არჩილ თალაკვაძემ ბრიფინგზე კომენტარი გააკეთა ასევე ე.წ. პოლიტპატიმრების თემასთან დაკავშირებით და აღნიშნა, რომ კონკრეტული პიროვნებების დაკავების, ან თავისუფლების შესახებ გადაწყვეტილებას არა რომელიმე კონკრეტული პოლიტიკოსი, არამედ შესაბამისი ინსტიტუტები იღებენ.
„გუშინ და დღეს ვისმენთ განსხვავებულ ინტერპრეტაციებს, რომელიც ეხება მაღალი პროფილის საქმეებს, რომლებზეც მიმდინარეობს გამოძიება აქ პირდაპირ შემიძლია გითხრათ, რომ ჩვენ პოლიტიკური პარტიები შევთანხმდით შემდეგზე, რომ მართლმსაჯულების სისტემა რომელიმე მხარის მიერ არ უნდა იყოს გამოყენებული პოლიტიკური მიზნებისათვის და არავინ არ უნდა შეეცადოს მართლმსაჯულებაზე პოლიტიკური ზეგავლენის მოხდენას.
ჩვენი პოზიცია აქამდეც, დღესაც და მომავალშიც იქნება სამართლებრივი სახელმწიფოს პრინციპი, სადაც მართლმსაჯულება არ შეიძლება იყოს პოლიტიკური პროცესების ნაწილი.
სხვა რაიმე კონკრეტული შეთანხმება ამ მიმართულებით დოკუმენტში არ არის მოცემული და თქვენ შეგიძიათ გაეცნოთ ამ შეთანხმების კონკრეტულ ტექსტს.
შესაბამისად კითხვებზე არის თუ არა რაიმე კონკრეტული გადაწყვეტილებები მიღებული და შეთანხმებული გუშინ რომელიმე ადამიანთან დაკავშირებით ვიზეც ოპოზიცია აკეთებს აქცენტებს, პირდაპირ შემიძლია გითხრათ , რომ არა ასეთი კონკრეტული შეთანხმება პარტიებს შორის გუშინ არ ყოფილა არც მიღწეული, არც ხელმოწერილი და არც დადასტურებული. ჩვენი სახელმძღვანელო პრინციპი არის სამართლებრივი სახელმწიფო, სადაც ვინმეს დაკავებაზე და პატიმრობაზე ან გათავისუფლებაზე გადაწყვეტილებებს არა პოლიტიკოსები, არამედ შესაბამისი ინსტიტუტები იღებენ,“ – განაცხადა არჩილ თალაკვაძემ.
ავტორი
თამთა ასლანიშვილი
