“მიყვარდა სახელისუფლებო ინსტიტუტების გამოყენება ხალხის დასახმარებლად, საქართველოს ფეხზე წამოსაყენებლად, დიდი პროექტების განსახორციელებლად” – მიხეილ სააკაშვილი

საქართველოს მესამე პრეზიდენტი, მიხეილ სააკაშვილი სოციალურ ქსელში, ფეისბუქის საკუთარი ოფიციალური გვერდის მეშვეობით, იხსენებს 2012 წლის არჩევნებს, როდესაც ხელისუფლება მშვიდობიანად გადააბარა არჩევნებში გამარჯვებულ პოლიტიკურ ძალას და ეხმაურება დავით უსუფაშვილის მიერ გაკეთებულ შეფასებებს:

,,12 წლის წინ მე მშვიდობიანად, ორგანიზებულად და ყოველგვარი ყოყმანის გარეშე გადავაბარე ძალაუფლება. გუშინ დავით უსუფაშვილმა განაცხადა, რომ მე ეს თურმე გავაკეთე უცხოეთიდან ზარის შედეგად და ჩემი გუნდის ზეწოლის შედეგად.

მე არ მინდა დათოს რაიმე სახის კრიტიკა, უბრალოდ შესწორება – 2012 წლის 1 ოქტომბერს მას შემდეგ, რაც ტელევიზიით ვნახე ეგზიტპოლების შედეგები სულ რამდენიმე წუთი დამჭირდა, რომ გამოვსულიყავი და მეღიარებინა მარცხი. ამ რამდენიმე წუთში არ მქონია საუბარი და შეხვედრა არავისთან და ვმოქმედებდი მხოლოდ ჩემი შიდა რწმენით და სიტუაციის სრული გააზრებით.

ასევე დათომ თქვა რომ მე უზომოდ მიყვარდა ძალაუფლება, ძვირფასო დათო, მე ძალაუფლება კი არ მიყვარდა, არამედ მიყვარდა სახელისუფლებო ინსტიტუტების გამოყენება ხალხის დასახმარებლად, საქართველოს ფეხზე წამოსაყენებლად, დიდი პროექტების განსახორციელებლად.

ძალაუფლება, რომ არაფრად მიღირს დავამტკიცე მოგვიანებით საქართველოზე მრავალჯერ დიდ უკრაინაში, სადაც პრემიერ მინისტრის თანამდებობაზე სამჯერ ვთქვი უარი, იმიტომ რომ ვთვლიდი, რომ იქ არსებული კონფიგურაციით ვერ შევძლებდი ცვლილებების განხორციელებას’’, – აღნიშნავს მიხეილ სააკაშვილი.

ავტორი
მარიამ ხაჩირაშვილი