„მოსახლეობამ იმისთვის აგვირჩია, რომ ვაკეთოთ ისეთი საქმე, რომელიც ქვეყანას თავსმოხვეულ გადაწყვეტილებებს და პრობლემებს აარიდებს“, – ამის შესახებ თბილისის მერმა კახა კალაძემ შესაბამისი შეკითხვის საპასუხოდ განაცხადა.
დედაქალაქის მერმა გავლენიანი საერთაშორისო ორგანიზაცია Responsible Statecraft-ის მიერ გამოქვეყნებული სტატია შეაფასა, სადაც აღნიშნულია, რომ საქართველოს სუვერენიტეტისადმი პრეზიდენტ ჯო ბაიდენის დამოკიდებულება არაგულწრფელია.
„ხალხი ყველაფერს ხედავს, როგორც ქვეყნის შიგნით, ისე გარეთ. ყველაფერი ცხადი და ნათელია. როგორ შეიძლება გამჭვირვალობა იყოს ცუდი ან პრობლემური? აქ გამჭვირვალობის შესახებ კანონი კი არ არის მთავარი სამიზნე გარედან – პრობლემა არის ორი რამ: ერთი, რომ სანქციებს არ შევუერთდით და ავხსენით, რატომაც არა.
სულელები ხომ არ ვართ?! გლეხი რომ ხარ და წვალობ, შენ ხომ არ დაგაზიანებთ?! ქვეყნის ეკონომიკას, საკუთარ თავს ხომ არ დავიზიანებთ?! ჩვენ ხელისუფლებაში რატომ ვართ? ხალხმა რატომ აგვირჩია? – იმისთვის, რომ გავატაროთ სწორი პოლიტიკა და ვაკეთოთ ისეთი საქმე, რომელიც ქვეყანას ზუსტად ისეთ ბოროტებას, თავსმოხვეულ გადაწყვეტილებებს და პრობლემებს აარიდებს, რაც ომთან არის დაკავშირებული; იმიტომაც ვართ ხელისუფლებაში, რომ ეს ყველაფერი ავირიდოთ და ქვეყანა სამშვიდობოს გავიყვანოთ; საქართველოს ინტერესები კი არ გამოვაყენებინოთ სხვას – პირიქით, შევინარჩუნოთ მშვიდობა“, – განაცხადა კახა კალაძემ.
მისივე შეფასებით, ქვეყნის მოსახლეობა კარგად ხედავს, თუ რა პროცესები მიმდინარეობს საქართველოში და ვის მიერ იმართება ეს ყველაფერი.
„მეორე პრობლემაა ის, რომ ქვეყანაში მეორე ფრონტი არ გაიხსნა. ეს არის დღევანდელი მოცემულობა. კიდევ ერთხელ ვიმეორებ: ჩვენი ქვეყნის მოსახლეობის უმრავლესობა აზროვნებს სწორად, ხედავს, თუ როგორ მიდის პროცესები, ვინ მართავს და რა დგას ამ ყველაფრის უკან, რა უნდათ საქართველოსთან მიმართებაში.
რომ გამოდიან და ამბობენ, დემოკრატიის თვალსაზრისით ნაბიჯები უკან გადაიდგაო, რა ნაბიჯები გადადგა უკან საქართველომ, შეიძლება ვინმემ ერთი მაგალითი მაინც დაასახელოს?! წარმოუდგენელია ეს დამოკიდებულება და მიიღებენ შესაბამის პასუხს 26 ოქტომბერს“, – აღნიშნა კახა კალაძემ.
აქვე, დედაქალაქის მერი გამოეხმაურა ქართული ოპოზიციური პარტიების წარმომადგენლების კრიტიკას აღნიშნულ სტატიაზე და განაცხადა, რომ ისინი საარჩევნო კამპანიას არა მოსახლეობის, არამედ კონკრეტული ქვეყნების საელჩოებისთვის ატარებენ.
„ფაქტები ძალიან მარტივია. რა კამპანია უნდა ჩაატაროს, ვისთან უნდა მივიდეს გვარამია ან მელია? ვის უნდა შეხვდნენ? რაზე უნდა დაელაპარაკონ? ვისთან უნდა მივიდეს ხაზარაძე? – იმ ხალხთან, რომელიც გააუბედურა, ქონება წაართვა თუ ვისთან უნდა მივიდნენ? ან რა უნდა დაპირდნენ?
ისინი საარჩევნო კამპანიას ატარებენ კონკრეტული ელჩებისა და საელჩოებისთვის. მათთვის ქვეყანა, მის შიგნით არსებული მდგომარეობა და ხალხი არ არსებობს.
ყველაფერი ცხადი და ნათელია – მათთვის არსებობს მხოლოდ და მხოლოდ გარე ურთიერთობები. განცხადებები, წამოცდენებიც ჰქონდათ, ერთმანეთს ეჯიბრებოდნენ, თუ ვის უფრო მეტი მისასვლელი ექნებოდა უცხოელებთან. ჩვეულებრივი აგენტები არიან. რასაც დაავალებენ, უბრძანებენ, ის უნდა შეასრულონ შეკითხვის დასმის გარეშე – რატომ? ეს არის მარტივი მოცემულობა“, – განაცხადა თბილისის მერმა.
ინფორმაციას თბილისის მერიის პრესცენტრი ავრცელებს
