ტელეკომპანია „მაესტროს“ გადაცემა „ბიზნესის სიახლეები“ მიუკერძოებლობის გამო დახურეს. ამის შესახებ თავად გადაცემის წამყვანმა ანა ცხოვრებოვამ პირდაპირ ეთერში ისაუბრა. მისი თქმით, არხის მენეჯმენტმა მთავარ მიზეზად მაესტროს ფორმატის შეცვლა დაასახელა, თუმცა წამყვანის განცხადებით ეს მიზეზი მისი და მისი გუნდისთვის არადამაჯერებელია.
“ჩვენთვის მთავარი პრიორიტეტი იყო, რომ თქვენ გადასახადების გადამხდელებს და ჩვენს მაყურებლებს გქონოდათ მიუკერძოებელი ინფორმაცია იმაზე, თუ რაზე იხარჯება თქვენს მიერ გადახდილი გადასახადები. ასევე, რა გავლენას ახდენს ესა თუ ის რეგულაცია და პოლიტიკური გადაწყვეტილება თქვენს ყოველდღიურ ცხოვრებაზე.
ვფიქრობ, რომ ეს არის მიზეზი, რის გამოც ჩვენ ერთმანეთს ამ ეთერში აღარ შევხვდებით. არხის მენეჯმენტმა ოფიციალურ მიზეზად დაასახელა ის, რომ იცვლება მაესტროს ფორმატი, თუმცა ეს ჩვენთვის არ ჟღერს დამაჯერებლად იმის გათვალისწინებით, რომ მას წინ უძღვოდა არაერთი მცდელობა ჩვენს სარედაქციო პოლიტიკაში ჩარევის. შესაბამისად, ვფიქრობთ, ეს არის საფასური, რომელსაც ვიხდით მიუკერძოებლობისა და კეთილსინდისიერებისათვის.
მე ვერ დაგპირდებით და ვერ გეტყვით შევხვდებით თუ არა კიდევ სხვა დროს, სხვა ეთერში და სხვა სივრცეში, თუმცა ერთი რამე შემიძლია ნამდვილად დაგპირდეთ, რომ თუ კიდევ ოდესმე შეგხვდებით რომელიმე ეთერში, რომელიმე სივრცეში – მეც და ჩემი გუნდიც ვიქნებთ ისეთივე მიუკერძოებლები, როგორებიც ვიყავით გასული სამი წლის განმავლობაში,” – განაცხადა ანა ცხოვრებოვამ “მაესტროს” პირდაპირ ეთერში.
ცნობისათვის: გადაცემა „ბიზნესის სიახლეები“ მაესტროზე 2017 წლის 13 ივნისიდან გადიოდა.
ავტორი
ბეჟან ბერულავა