საქართველოს ავტო იმპორტიორთა და ავტომფლობელთა ასოციაციის თავმჯდომარე, ლაშა დარბაისელი, სააგენტო ,,პარალელთან” ინტერვიუში, ავტოიმპორტის სექტორში შექმნილი მდგომარეობის სესახებ საუბრობს:
“როგორც ბოლო პერიოდებში ახასიათებდა ავტობაზრობას, თითქმის იგივენაირად – ძალზე შემცირებულია ქართველი ავტო იმპორტიორების მოგება, ხოლო უცხო ქვეყნის მოქალაქეების – გაზრდილია, იმ ხალხის, რომელიც შეიძლება იყოს აღქმული ქართველი ავტო იმპორტიორის კონკურენტად.
წლების წინ, როდესაც ქართველი ავტო იმპროტიორები ყიდდნენ უცხო ქვეყნის მოქალაქეებზე, დღეს ეს უცხოელები კონკურენციაში შედიან ქართველ ავტო იმპორტიორებთან. ისინი თვითონ აწესებენ მანქანებზე ფასებს, რაც შემდგომში ერთ-ერთი მიზეზი ხდება იმისა, რომ ქართველი დილერები იძულებულები არიან მანქანა მინიმალური ღირებულებით მიჰყიდონ უცხო ქვეყნის მოქალაქეებს.
საბოლოო ჯამში, საქართველოში რჩება მხოლოდ რეექსპორტში გადახდილი მინიმალური თანხა. როდესაც ისინი წლების წინ ჩვენგან ყიდულობდნენ, ავტომობილის მთლიანი ღირებულება და მასში გადახდილი თანხა ჩვენს ქვეყანაში რჩებოდა, ხოლო დღეს, როდესაც ისინი მხოლოდ ჩვენი პორტითა და გზით სარგებლობენ, გადავიქეცით სატრანსფერო ქვეყნიდან სატრანზიტო ქვეყნად.
თითქმის ყველა ჩვენი მეზობელი ქვეყანა სარგებლობს ჩვენი პორტით, სარგებლობს ჩვენი გზით და იხდის მხოლოდ რეექსპორტის თანხას და არა მთლიანი ავტომობილის ღირებულების თანხას. ამით კოტრდებიან ავტო იმპორტიორები, მათი ოჯახი და ქვეყანა.
ნუ დაგვავიწყდება, რომ ავტო იმპორტიორების დიდ ნაწილს ეს თანხები ბანკიდან აქვთ გამოტანილი. დარგისთვის, რომელიც ქვეყანაში ექსპორტის მართულებით პირველ ადგილზეა, სახელმწიფოს მხრიდან უფრო მეტი ყურადღება მართებს, რადგან ფაქტია, ჩვენ გვაქვს ავტომობილები, უმეტესი წილი – მეორადი, უკეთესია გვქონდეს ნავთობი, გაზი, მაგრამ მოცემულობა ეს არის, სამწუხაროდ.
შესაბამისად, სახელმწიფომ ყველანაირად უნდა შეუწყოს ხელი, რომ დარგი აღორძინდეს და აყვავდეს. ჩვენი დარგი იყოს ერთ-ერთი მამოძრავებელი ქვაკუთხედი ქართული ეკონომიკის აღმავლობისა”, – განაცხადა ლაშა დარბაისელმა.
ავტორი
ნინი ხიჯაკაძე
