ტყიბულში ძიძიგურის სახელობის შახტის თანამშრომლები გაიფიცნენ.
დასაქმებულები სამსახურში მიდიან, თუმცა, პროტესტის ნიშნად, არ მუშაობენ.
ისინი ახალი ინვესტორის გადაწყვეტილებას, მათი მინდელის სახელობის შახტში გადაყვანის შესახებ აპროტესტებენ და სამუშაო ადგილის შეცვლაზე უარს აცხადებენ.
ძიძიგურის შახტში დასაქმებულები შიშობენ, რომ ობიექტზე ექვსი თვის წინ მისული უკრაინული კომპანია საბოლოოდ შახტის დახურვას და მათი სამსახურიდან გათავისუფლებას გეგმავს. მთავარ მიზეზად კი კომპანიის მიერ საინვესტიციო ვალდებულების შეუსრულებლობას ასახელებენ.
“შახტის დახურვა რომ განზრახული აქვთ, ამაში ეჭვი არავის ეპარება. ექვსი თვეა მოსულები არიან და ექვსი ლარი არ დაუხარჯავთ. ბაგირის შეცვლას იდებენ მიზეზად. თუ ბაგირის ფული არ აქვთ, რამდენიმე მილიონიან ინვესტიციას როგორ განახორციელებენ?!
ყველას ახსოვს ეკონომიკის მინისტრი ნათია თურნავა რომ იყო ჩამოსული, რამდენიმე თვის წინ, რა დაპირებებიც გასცა. არაფერი არ შესრულდა.
იმის ნაცვლად, რომ ახალ კომპანიას გაეუმჯობესებია პირობები, პირიქით, გააუარესა ყველაფერი.
სამი დღეა აქ ვართ და არავინ მოსულა“, – ამბობს ძიძიგურის სახელობის შახტში დასაქმებული, ირაკლი ჩიხლაძე.
საკითხში ჩართულია პროფკავშირები. როგორც, ტყიბულის პირველ პროფკავშირში ამბობენ, მეშახტეებს ერთი კვირის განმავლობაში ფეხით გადაადგილება და მძიმე შრომა მოუწიათ, რისი გაგრძელებაც ფიზიკურად აღარ შეუძლიათ. ონისე საბანაძის თქმით, ძიძიგურის შახტის ხელმძღვანელობა მზად არის ბაგირი ტექ. ინსპექციაზე გაგზავნოს.
„ჩვენ წერილობით მივმართეთ ხელმძღვანელობას და ვადის გადაწევა ვთხოვეთ. მათგან მივიღეთ დაპირება, რომ მოხდება ბაგირის ტექ. დათვალიერებაზე გადაგზავნა. მანამდე კი მეშახტეებს მინდელის შახტაში გადაყვანას სთავაზობენ,რაზეც დასაქმებულები კატეგორიულ უარს ამბობენ. ისინი მესახტეების რაოდენობის შემცირებასა და ძიძიგურის სახელობის შახტის დახურვის საშიშროებას ხედავენ“- განაცხადა ტყიბულის პირველი პროფკავშირის წარმომადგენელმა, ონისე საბანაძემ
ტყიბულის შახტების მფლობელი კომპანიის, “Coal of Georgia”-ს დირექტორი კი ამბობს, რომ მუშების მინდელის შახტში გადაყვანა ტექნიკურ სამუშაოებს უკავშირდება, რისთვისაც დაახლოებით სამთვიანი ვადაა საჭირო.
„ეს არის დროებითი შეჩერება ტექნიკური რემონტისთვის. არც მუშების და არც ხელფასის შემცირება არ იგეგემება. ტექნიკურ სამუშაოებს დაახლოებით სამი თვე დასჭირდება“, – განაცხადა კომპანიის დირექტორმა მიხეილ სოცკიმ.
კომპანიის მიერ დასახელებული ვადები გაფიცული მეშახტეებისთვის მიუღებელია
აქციის მონაწილეები ამბობებ, რომ არანაირი პირობის სანაცვლოდ მინდელის შახტში არ გადავლენ.
ავტორი
ლიკა დევდარიანი
სააგენტო “პარალელის”
რეგიონალური კორესპონდენტი