სამოქალაქო აქტივისტი, ტატო ბასილაია სააგენტო ,,პარალელთან” კომენტარს აკეთებს, ქვეყნის ევროპულ მომავალსა და მოახლოებულ საპარლამენტო არჩევნებთან დაკავშირებით:
,,მოგეხსენებათ, ჩვენი ერის დევიზია „ძალა ერთობაშია”. გაერთიანებას და ერთობას არ აქვს ალტერნატივა. როცა ერთი ქოლგის ქვეშ ერთიანდებიან პროგრესულად მოაზროვნე პროდასავლური ძალები ეს, რა თქმა უნდა, მისასალმებელია.
ვფიქრობ, რომ ერთადერთი გზა ამ ხელისუფლების დასამარცხებლად სწორედ ერთობაზე გადის. ჩვენ ამ ეტაპზე მივიღეთ რამდენიმე გაერთიანება და ეს, რა თქმა უნდა, კარგია, მაგრამ, ვფიქრობ, ოქტომბერში ყველანი ერთად უნდა დავდგეთ, რომ შევცვალოთ დემოკრატიული არჩევნების გზით ეს რუსული რეჟიმი, რომელიც ქვეყანას მხოლოდ დაღუპვას უქადის.
არჩევნების სრულიად ელექტრონული სისტემით ჩატარება შეიძლება კიდევ ერთი ძლიერი ბერკეტი გახდეს ხელისუფლების ხელში არჩევნების გასაყალბებლად. მოგეხსენებათ, რუსეთი მთელი მსოფლიოს მასშტაბით ცდილობს ხელების ფათურს საარჩევნო პროცესებში და ვფიქრობ, არც ჩვენი არჩევნები იქნება გამონაკლისი. მითუმეტეს მაშინ, როცა ასეთი ძლიერი დასაყრდენი ჰყავს ,,ქართული ოცნების სახით”. თუმცა, მათ ვერ გაითვალისწინეს ქართველი ხალხის ერთობის ძალა, რომელსაც შეუძლია მტერს ნებისმიერი საძირკველი გამოაცალოს და საკადრისი პასუხი გასცეს.
ახლა, როგორც არასდროს, ისე გვჭირდება ქუდზე კაცი, ნებისმიერი თაობის წარმომადგენელი უნდა მივიდეს არჩევნებზე და მხარდაჭერა გამოუცხადოს საქართველოს ნათელ მომავალს. ახალგაზრდებმა უნდა ვცადოთ და არასწორ მხარეს მდგარ ჩვენს თანატოლებსა თუ უფროსი ასაკის წარმომადგენლებს უნდა დავანახოთ რეალური სურათი და დავაყენოთ სწორ გზაზე”, – განაცხადა ტატო ბასიალაიამ.
ავტორი
ნინი ხიჯაკაძე
