“რაც უფრო მეტი ვიქნებით, უფრო დამაჯერებელი იქნება ჩვენი გამარჯვება, ერთიანობით ვიგებთ!” – თამარ კორძაია

,,ერთიანობის’’ წევრი, თამარ კორძაია, დღეს გამართულ ბრიფინგზე, საუბრობს არჩევნებში ხმების დაცვის აუცილებლობის შესახებ:

,,2024 წლის 26 ოქტომბერი არის ჩვენი ქვეყნის ხსნის, თავისუფალი არჩევანის და თითოეული მოქალაქის მიერ მიღებული გადაწყვეტილების დაცვის დღე.

წინასაარჩევნო გარემო უკიდურესად პოლარიზებული, ძალადობრივი და უთანასწოროა. ჩვენი ერთიანობა და ხმების დაცვა არის საბოლოო წარმატების საწინდარი.

დღეს 15 ივლისია და ჩვენ ახალგაზრდებთან ერთად უკვე დავიწყეთ წინასაარჩევნო გარემოს შესწავლა/შეფასება. პირველი, რაზეც გვინდა მივიპყროთ ამომრჩევლის ყურადღება, არის ის, რომ პერიოდულად, აუცილებლად, გადაამოწმონ საკუთარი თავი ცესკოს ვებგვერდზე, ამომრჩეველთა ერთიან სიაში შეამოწმოთ თქვენი თავი და გადაამოწმოთ, თქვენთან ერთად კიდევ ვინ არიან დარეგისტრირებულები. განსაკუთრებით საზღვარგარეთ მყოფ ჩვენს მოქალაქეებს ვთხოვთ, საკონსულოში რეგისტრაციასთან ერთად, ცესკოს საიტზე გადაამოწმონ საკუთარი თავი ამომრჩეველთა ერთიან სიაში, რადგან თუ თავს ვერ იპოვით ცესკოს სიაში, მხოლოდ საკონსულოში რეგისტრაცია არ იქნება საკმარისო ხმის მისაცემად.

ამასთანავე, ამ ახალგაზრდებთან ერთად, რომლებიც უკვე ჩართული არიან არჩევნებზე დაკვირვების პროცესში, ვიწყებთ მოხალისეების მობილიზაციას არჩევნების დღეს უბნებში დაკვირვების მიზნით.

ჩვენი ერთიანობით გვინდა დავიცვათ თითოეული მოქალაქის არჩევანი, თითოეული ხმა გადამწყვეტია და დასაცავი. მოხალისეებს წინასწარ მივაწვდით ყველა საჭირო ინფორმაციას, რაც უნდა იცოდნენ ხმების დასაცავად.

ასევე, ჩვენ სოციალურ ქსელებში განთავსდება რეგისტრაციის ფორმები და მაქსიმალურად ვეცდებით შევქმნათ თქვენთვის ხელსაყრელი პირობები. მოხალისედ რეგისტრაცია მარტივია: უნდა მიუთითოთ სახელი, გვარი, ტელეფონი, ელ-ფოსტა და თქვენთვის ხელსაყრელი ქალაქი, რაიონი ან სოფელი საიდანაც შეძლებთ ჩვენი ქვეყნისა და ჩვენი მომავლის დაცვას.

რაც უფრო მეტი ვიქნებით, უფრო დამაჯერებელი იქნება ჩვენი გამარჯვება, ერთიანობით ვიგებთ!’’, – განაცხადა თამარ კორძიამ.

ავტორი
მარიამ ხაჩირაშვილი