ქუთაისის მცხოვრები ბესიკ ადამია, ქალაქში არსებული მოსწავლე ახალგაზრდობის პარკის შესასვლელის სახურავის ჩამოშლის ფაქტს გამოეხმაურა, სოციალურ ქსელში შესაბამისი ფოტოები გაავრცელა და ქუთაისის მერიას პარკის დირექციის მხარდაჭერისკენ მოუწოდა.
“ყინვების შემდეგ მოსწავლე ახალგაზრდობის პარკის სახურავმა შლა დაიწყო. ფოტოები დღის მეორე ნახევარში პირადად გადავიღე. იმედია, მერია პარკის ადმინისტრაციას მხარდაჭერას გამოუცხადებს,” – წერს ბესიკ ადამია.
ქუთაისის მერიის ინფრასტრუქტურის სამსახურში კი აცხადებენ, რომ მოქალაქეების უსაფრთხოების მიზნით ბათქაში თვითონ ჩამოყარეს და პრობლემის მოგვარება უკვე დაწყებული აქვთ, თუმცა სამუშაოების დასრულების სავარაუდო თარიღს ვერ ასახელებენ.
„საქმის კურსში ვართ და ვზრუნავთ მის მოგვარებაზე. მორყეული ბათქაშის ფილები თვითონ ჩამოვაყრევინეთ ჩვენს სამსახურებს, თავში რომ არავის დაცემოდა. ამ ეტაპზე ხარჯთაღრიცხვის და საპროექტო საკითხების მოგვარებაზე ვმუშაობთ. უახლოეს პერიოდში პარკის ციტადელი პირვანდელ სახეს დაუბრუნდება,“ – განაცხადა ქუთაისის მერიის ინფრასტრუქტურის სამსახურის უფროსმა ბექა ყურაშვილმა.
ავტორი
ლიკა დევდარიანი
სააგენტო “პარალელის”
რეგიონალური კორესპონდენტი