„სტრატეგია აღმაშენებლის“ ფარგლებში, გიორგი ვაშაძის ინიციატივით, მე-9 თემატური პრეზენტაცია “სასამართლო რეფორმის ქართულ მოდელის” თემაზე გაიმართა. წარმოდგენილი რეფორმის პროექტი 5 ძირითადი პუნქტისაგან შედგება, რაზეც ღონისძიების ფარგლებში სხვადასხვა ოპოზიციური პარტიების წარმომადგენლებმა და იურისტებმა იმსჯელეს.
„ახალი საქართველოს“ თავმჯდომარემ გიორგი ვაშაძემ ისაუბრა სასამართლო სისტემის დამოუკიდებლად ფუნქციონირების მნიშვნელობაზე და დაწვრილებით განმარტა 5 ძირითადი ინიციატივა, რომელიც „სტრატეგია აღმაშენებლის“ ფარგლებში საზოგადოებას შესთავაზა.
„თუ ჩვენ სანდო სასამართლო სისტემა არ ჩამოვაყალიბეთ, საქართველოს მოქალაქე დაცული ვერ იქნება ქვეყანაში, ჩვენ ვერ მოვიზიდავთ ინვესტიციებს და ეკონომიკას ვერ განვავითარებთ იმიტომ, რომ არცერთი ბიზნესი, არცერთი ინვესტორი არ ენდობა დღეს საქართველოს სასამართლო სისტემას.
ჩვენ ვერ შევქმნით სამუშაო ადგილებს, ჩვენ ვერ შევძლებთ ქვეყნის განვითარებას, თუ სასამართლოს რეფორმა არ მოხდა და სანდო სასამართლო სისტემა არ ჩამოვაყალიბეთ.
აქედან გამომდინარე ძალიან მნიშვნელოვანია, რომ ოპოზიციური პოლიტიკური პარტიები ერთობლივად შევთანხმდით ერთ რამეზე, არა მარტო საარჩევნო სისტემაზე ვმუშაობთ და არჩევნებისთვის ვემზადებით, არამედ დადგა დრო იმისთვის, რომ ჩვენ ყველანი არჩევნებამდე შევთანხმდეთ როგორი სასამართლო სისტემის აშენებას და როგორი რეფორმების გატარებას ვაპირებთ,“ – აღნიშნავს გიორგი ვაშაძე.
გიორგი ვაშაძეს მიზანშეწონილად მიაჩნიას, რომ ოპოზიციური პოლიტიკური პარტიები, სასამართლო სისტემის რეფორმაზე, არჩევნებამდე შეთანხმდნენ და პარლამენტში შესვლისას სწორედ იმ რეფორმას მისცენ ხმას, რომელზეც არჩევნებამდე შეჯერდებიან.
პრეზენტაციაზე საკუთარი მოსაზრებები „გირჩის“, „ევროპული საქართველოს“, „ლეიბორისტული პარტიის“ წარმომადგენლებმა და სფეროს სხვა ექსპერტებმა დააფიქსირეს.
ავტორი
თამთა ასლანიშვილი
