საგარეო საქმეთა მინისტრის პირველი მოადგილე ვახტანგ მახარობლიშვილი ევროკავშირ-საქართველოს საპარლამენტო ასოციაციის კომიტეტში სიტყვით გამოვიდა. მინისტრის მოადგილემ ისეთ მნიშვნელოვან საკითხებზე გააკეთა აქცენტი, როგორიცაა რუსეთ-საქართველოს კონფლიქტი, ე.წ. მცოცავი ოკუპაცია და ისაუბრა რუსეთის ფედერაციის მიერ საქართველოს მიმართ მუდმივ პროვოკაციებზე.
სიტყვით გამოსვლისას ვახტანგ მახარობლიშვილმა ყურადღება გაამახვილა ოკუპირებულ ტერიტორიებზე არსებულ მძიმე ჰუმანიტარულ და უსაფრთხოების რთულ მდგომარეობაზე, რომელიც ეხება რუსი ჯარისკაცების მიერ ქართველების უკანონოდ დაკავებების არაერთ შემთხვევას, საოკუპაციო ზონებში ქართულ ენაზე განათლების მიღების აკრძალვას, საოკუპაციო საზღვრის დახურვას, რა დროსაც საქართველოს მოქალაქეებს ეზღუდებათ გადაადგილება. ასევე ვახტანგ მახარობლიშვილმა ყურადღება გაამახვილა ევროკავშირის სადამკვირვებლო მისიის ამ პროფილით მუშაობის აუცილებლობაზე.
„რუსეთის დესტრუქციული პოლიტიკა მიმართულია რეგიონში მშვიდობისა და სტაბილურობის დარღვევისკენ. საერთაშორისო საზოგადოებამ უნდა მოახდინოს რეაგირება. რუსეთ-საქართველოს კონფლიქტის საკითხი აქტიურად უნდა იყოს საერთაშორისო დღის წესრიგში, ჩვენ ჩვენი პარტნიორებისგან და განსაკუთრებით ევროკავშირისგან მოვითხოვთ ამ საკითხების განხილვას რუსეთთან,“ – განაცხადა ვახტანგ მახარობლიშვილმა.
ავტორი
თამთა ასლანიშვილი