საქართველოს ფინანსთა სამინისტროს საგამოძიებო სამსახურის თანამშრომლებმა, ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, წინასწარი შეთანხმებით ჯგუფის მიერ, არასრულწლოვანით ვაჭრობის – ტრეფიკინგის ფაქტზე, შვიდი პირი დააკავეს.
დაკავებულთა შორის ერთ-ერთი ბავშვის დედაა და სამედიცინო დაწესებულების ორი ექიმი. დაკავებულთაგან, ერთ-ერთი გასულ წლებში, ამავე სახის დანაშაულზეა ნასამართლევი.
გამოძიებით დადგენილია, რომ ბრალდებულებმა, პირადი მატერიალური გამორჩენის მიღების მიზნით, განიზრახეს გაეყიდათ არასრულწლოვანი, ხოლო მიღებული თანხა, 13 ათასი დოლარი, გაენაწილებინათ ურთიერთშორის.
როგორც გამოძიებიდან ირკვევა, დანაშაულის დაფარვის მიზნით, ბავშვის მშობელი დედა სამედიცინო დაწესებულებაში სხვა სახელითა და გვარით დარეგისტრირდა, ხოლო მშობიარობის შემდეგ ახალშობილი გაყიდა.
ბრალდებულმა სამშობიარო კლინიკა „ბაიებში“ იმშობიარა.
საქართველოს ფინანსთა სამინისტროს საგამოძიებო სამსახურის უფროსმა გამომძიებელმა თორნიკე ბიბილეიშვილმა ბრიფინგის დროს განაცხადა, რომ მიმდინარე წლის 6 თებერვალს, განხორციელებული ახალშობილის გაყიდვის შემდეგ, დანაშაულებრივ სქემაში ჩართული შვიდივე პირი დააკავა, ხოლო ახალშობილი დროებით მეთვალყურეობაში გადასცა სახელმწიფო ზრუნვისა და ტრეფიკიგნის მსხვერპლთა და დაზარალებულთა დახმარების სააგენტოს.
ცოტა ხნის წინ გავრცელდა ინფორმაცია, რომ ახალშობილი ჩვილის გაყიდვის ბრალდებით დაკავებული შვიდივე პირი სასამართლომ გირაოს სანაცვლოდ გაათავისუფლა.
გამოძიება მიმდინარეობს საქართველოს სისხლის სამართლის კოდექსის 143-ე 2 პრიმა მუხლის მესამე ნაწილით, რაც სასჯელის სახით ითვალისწინებს თავისუფლების აღკვეთას 14-დან 17-წლამდე ვადით.
ავტორი
თამთა ასლანიშვილი
