აღარ აქვს აზრი “ქართულ ოცნებასთან” საუბარს, ვაპირებთ ძალიან ბევრ რაიონსა და რეგიონში ჩავიდეთ, შევხვდეთ გლეხებს და ვუთხრათ, რომ მათ მიწას ფასი ექნება და ამ ქვეყანას პერსპექტივა აქვს – გიორგი ვაშაძე

200

ოპოზიციური პარტიის ლიდერებმა, ტვ “პირველის” გადაცემა „რეაქციაში“ გიგი უგულავას დაკავებასა და მათ სამოქმედო გეგმაზე ისაუბრეს.
„ახალი საქართველოს“ თავმჯდომარე გიორგი ვაშაძემ განაცხადა, რომ მმართველ პარტიას მოსალოდნელი საფრთხეების ეშინია, რომელიც არჩევნების გზით გამოიკვეთება. მისი თქმით, “ქართული ოცნება” პერსონალურ ტერორზე გადავიდა, რადგან მმართველმა პარტიამ წინასაარჩევნოდ მაქსიმალურად ბევრი ადამიანი გაანეიტრალოს:

ფაქტია, რომ რეჟიმი უკან არ დაიხევს, იმიტომ რომ მათ ეშინიათ არჩევნებში დამარცხების. არანაირი სისტემა მათ არ შველით, როგორი საარჩევნო სისტემაც არ უნდა იყოს. გადავიდნენ პერსონალურ ტერორზე, ოპოზიციური ლიდერების დაკავებაზე, რათა მაქსიმალურად ბევრი ადამიანი გაანეიტრალონ. ფიქრობენ, რომ ამით მაინც მიაღწიონ რაღაცა შედეგს, იმიტომ რომ ყველა კვლევის თანახმად ისინი კატასტროფულ დღეში არიან,“ – აღნიშნა გიორგი ვაშაძემ.

ოპოზიციონერმა ლიდერმა სამოქმედო გეგმებზეც ისაუბრა. მან ხაზი გაუსვა 4 აპრილს დაგეგმილი მასშტაბური პროტესტს მნიშვნელობას და ქართველ საზოგადოებას აქციაზე გამოსვლისკენ მოუწოდა.

მთავარი კითხვა – რას აპირებს ოპოზიცია? პირველი, რომ ჩვენ გამოვაცხადეთ 4 აპრილი, 4 საათზე შევიკრიბებით რუსთაველზე, მაგრამ რატომ ამხელა დრო?! – იმიტომ, რომ ჩვენ ვაპირებთ ხალხს ვესაუბროთ. აღარ აქვს აზრი “ქართულ ოცნებასთან” საუბარს.

ვაპირებთ ძალიან ბევრ რაიონსა და რეგიონში ჩავიდეთ, შევხვდეთ გლეხებს და ვუთხრათ, რომ მათ მიწას ფასი ექნება და ამ ქვეყანას პერსპექტივა აქვს. სოფელი განვითარებული იქნება, შევხვდებით რაიონის მაცხოვრებლებს და ვეტყვით, რომ რეალური თვითმართველობა იქნება მათ ქალაქებში. ჩვენ უნდა შევხვდეთ ადამიანებს და ვუთხრათ, რომ სასამართლო იქნება მიუკერძოებელი და ისინი აირჩევენ მოსამართლეებს და პროკურორებს.

პირველი პრეცენდენტია საქართველოს უახლეს ისტორიაში, როდესაც უპრეცენდენტო რაოდენობით ოპოზიციური პარტიები ერთიანდებიან და ამბობენ ერთ რამეს – დიახ, ჩვენ ყველა ერთად უნდა წავიდეთ და ერთი გზავნილით უნდა შევხვდეთ ხალხს. ქვეყანა არის გადასარჩენი!.

ჩვენ ვართ ძალიან სერიოზული პრობლემის წინაშე. ჩვენ ვართ ერთის მხრივ საერთაშორისო იზოლაციის წინაშე და მეორე – გაჭირვების, უბედურების პროცესის წინაშე. გვსურს ვუთხრათ ხალხს, რომ საქართველოს დიდი პერსპექტივა აქვს და ბიძინა ივანიშვილი, “ქართული ოცნება” არ არის გამოწერილი ჩვენთვის, სამუდამოდ. გადაწყვეტილება არის თითოეული მოქალაქის ხელში.

თუ ჩვენ გვინდა ვიყოთ ცივილიზებული სამყაროს ნაწილი და არ გვინდა ვიყოთ ამ უბედურებაში, მაშინ ჩვენ თვალი უნდა გავახილოთ“, – განაცხადა გიორგი ვაშაძემ გადაცემა „რეაქციაში“.

ავტორი
ბეჟან ბერულავა

კომენტარები